Për 4 persona nevojiten stinko qengji (parakrahë ) 4 copë,
vaj ulliri, 2 lugë gjelle,
kripë, sipas dëshirës,
piper i zi i sapo bluar, sipas dëshirës,
hudhër 6 thelpinj, të pa qëruar, por të shpuar me majën e një thike,
rozmarinë e freskët, 6 degë,
lëng pule ose perimesh, 300 ml
Ndezim fillimisht furrën në temperaturën 240°, që të nxehet.
Vendosim mishin e qengjit në një tepsi, dhe e lyejmë mirë me vaj ulliri (mirë është ta mbani vertikalisht). E rregullojmë me kripë dhe pipër të sapobluar dhe, kur furra të jetë gati, e fusim të marrë një faqe për 20 minuta, deri sa të përftojë një ngjyrë të kuqërremtë.
Pas 20 minutash e heqim nga furra dhe e ulim temperaturën në 165 gradë.
Ndërkohë që temperatura e furrës bie, e spërkasim mishin me yndyrën që ka kulluar në tepsi, dhe shtojmë hudhrat dhe rozmarinën. Shtojmë 150 ml lëng pule ose perimesh dhe mbulojmë mirë nga sipër me flete alumini, së cilës ia mbyllim mirë anët, që të mos dalin avujt e gatimit.
E fusim në furrë për 2 orë.
Nxjerrim mishin nga furra, rrisim temperaturen në 200 gradë, heqim letrën e aluminit, shtojmë lëngun e mbetur dhe e vazhdojmë gatimin në furrë edhe për 15 minuta.
E shërbejmë të ngrohtë duke e spërkatur me lëngun e vet, dhe mund ta shoqërojmë me domate, qepë e karrota të furrës.
