Shërbimi Metereologjik Ushtarak, ka bërë me dije se java në të cilën sapo kemi hyrë, do të karakterizohet nga i nxehti afrikan. Sipas tabelës së temperaturave publikuar në faqen zyrtare të SHMU, temperaturat këtë javë, do të shkojnë rreth 42 gradë në Berat e Gjirokastër, ndërkohë që rrethet e tjera, përfshi dhe Tiranën nuk shkojnë më poshtë se 39 gradë.
Kjo javë, shkruan në njoftimin e vet SHMU, pritet të jetë një ndër javët më të vështira sa i përket temperaturave të larta por jo vetëm. Mbi rajonin e Ballkanit (rrjedhimisht edhe mbi vendin tonë) gradualisht po depërtojnë masa ajrore të nxehta me origjinë nga shkretëtira e Saharasë. Si rrjedhojë për ditën e sotme temperaturat arritën deri në 39 grad celcius (Gjirokastër) dhe 37 grad për kryeqytetin.
Për t’u theksuar është se për shkak të origjinës nga shkretëtira e Saharasë, parashikohet që masat ajrore do të kenë një sasi të lartë të grimcave të pluhurit dhe rërës. Cilësia e ajrit do të jetë e dobët për shkak të sasisë së lartë të këtyre grimcave si dhe do të krirjojnë efektin serë sa i përket temperaturave. Për shkak të temperaturave të larta mbi 40 grad celcius që priten të regjistrohen nga mesjava e deri në fundjavë (kryesisht zonat e ulëta), këshillojmë të gjithë ndjekësit tanë të shmangin sa më shumë ekspozimin në diell pa arsye të fortë.
