Ka ngjallur reagime të shumta në opinionin publik, trajtimi i veçantë familjar për familjen e Klodian Rashës, të riut 25 vjeçar, i cili u vra më 8 dhjetor nga dora e një efektivi të policisë, rreth orës 2 të mëngjesit.
Në mbështetje të nenit 100 të Kushtetutës dhe të nenit 5/1/b, të ligjit nr. 7703, thuhet në këtë vendim rë Këshillit të Ministrave, datë 11.5.1993, “Për sigurimet shoqërore në Republikën e Shqipërisë”, të ndryshuar, me propozimin e Kryeministrit, Këshilli i Ministrave, vendosi: Dhënien e trajtimit të veçantë familjes të të ndjerit Klodian Rasha, i cili, në datën 8.12.2020, humbi jetën aksidentalisht, si pasojë e veprimeve policore, në masën e tetëfishit të pensionit social, të miratuar sipas ligjit nr. 7703, datë 11.5.1993. 2. Trajtimi i veçantë familjar, financiar mujor, i paguhet kryefamiljarit z. Qazim Osman Rasha. Ky vendim hyn në fuqi menjëherë, botohet në Fletoren Zyrtare dhe i shtrin efektet nga data 1 dhjetor 2020.
Nuk dihet për ç’motive vendimi i shtrin efektet nga data 1 dhjetor, kohë kur Klodiani i ndjerë qe ende gjallë, por ajo që nuk mund të mohohet, është ndjeshmëria tejet e lartë e opinionit publik, ndaj këtij vendimi, i cili vjen menjëherë pas zbehjes së protestave nisur më 9 dhjetor, të cilat u përshkallëzuan thuajse në të tërë Shqipërinë.
