Dy nga masat e marra prej Komitetit Teknik të Ekspertëve, kanë qenë të lidhura ngushtë me shkollat e mesme e ato të larta, duke qenë se, sipas të dhënave nga përditësimi i situatës covid në vend, vihet re një shtim i numrit të të prekurëve në grupmoshat nga 15-24 vjeç. Për këtë arsye, u shpreh Manastirliu në takimin e sotëm me gazetarët, shkollat e mesme që ndodhen në zonat e riskut të lartë, kalojnë onlajn, kurse sezoni i provimeve zgjatet.
Nisur nga shtimi i rasteve të infektimeve të reja në grupmoshën 15-24 vjeç, u shpreh ajo, shkollat e mesme, në zonat e riskut të lartë ku përfshihen bashkitë Tiranë, Fier, Vlorë, Berat, Durrës, Gjirokastër, Lezhë, Lushnje, Pogradec dhe Kamëz, do të aplikojnë skenarin e tretë, pra atë të mësimit onlajn, për periudhën 11 shkurt deri në 26 shkurt, kurse sezoni i provimeve për universitetin rekomandohet të zgjatet, për të siguruar kombinimin e provimeve onlajn dhe atyre në auditor, për lëndët që kërkojne me domosdoshmëri prezencën, sipas vlerësimit të bërë nga ministria e Arsimit, Sporteve dhe e Rinisë, duke zbatuar rreptësisht protokollet anti-covid.
