Kreu i Kuvendit Gramoz Ruçi, ka mbyllur sot aktivitetin e tij politik, ashtu siç edhe e paralajmëroi në Kongresin e Jashtëzakonshëm të PS-së. Në fjalën e mbajtur, ai falënderoi zgjedhësit e Sarandës, Tepelenës dhe qarkut Fier që e zgjodhën deputet, e po ashtu edhe stafin e Kuvendit për bashkëpunimin, ambasadorët Kim e Soreca për mbështetjen, si dhe gjithë partnerët strategjikë, që kishin mbështetur reformat e ndërmarra nga Kuvendi.
Në fjalën e tij Ruçi nuk harroi të falenderonte edhe gazetarët e mediet e pranishme ndër vite, e po ashtu organizatat e shumta që kanë ndërvepruar me të gjatë qëndrimit në krye të Kuvendit.
Siç e kam bërë të ditur, në përfundim të kësaj legjislature, unë kam vendosur t’i jap fund angazhimit dhe kontributit tim institucional në Kuvendin e Shqipërisë dhe në Partinë Socialiste, e cila është familja ime politike, tha ai. Unë u jam mirënjohës Partisë Socialiste dhe qytetarëve të Sarandës, Tepelenës si edhe të qarkut Fier që më zgjodhën deputet në tetë legjislatura. Si një prej deputetëve më të hershëm në këtë sallë gjatë tre dekadave të jetës demokratike, shpreh mirënjohjen dhe vlerësimin për të gjithë kolegët deputetë, gjatë të gjitha legjislaturave. Si me ata që kemi qenë në njerin krah të sallës, ashtu edhe për ata në krahun tjetër.
Për rreth tre dekada në këtë sallë, gjysmën e kohës kam qenë në maxhorancë dhe gjysmën në opozitë. Por gjithmonë, në këtë sallë dhe përtej saj, në të gjithë jetën dhe karrierën time politike, kam bërë më të mirën për të sjellë zërin, nevojat e zgjidhjet për të gjithë qytetarët, pavarësisht nëse kanë votuar mua, partinë time apo kundërshtarët tanë.
Në garat zgjedhore kam konkurruar me dinjitet dhe sinqeritet. Në Kuvendin e Shqipërisë kam ardhur si shërbyes publik dhe kam kontribuar me përkushtim e integritet. Nëse nuk kam bërë më të mirën që prisnin qytetarët shqiptarë, kjo ka ndodhur jo se nuk kam dashur apo nuk kam ditur, por nuk kam mundur. Madje, do të thoshja, nuk kemi mundur, tha kreu i Kuvendit Gramoz Ruçi mes të tjerave.
