Shumë zhurmë për VKM-në e mesatares për studimet Bachelor në mësuesi!
VKM e djeshme, de fakto, ndan studentët që do të studjojnë në programe të njëjta Bachelor, pra thjesht maturantët duhet të deklarohen, që në fillim, nëse synojnë të vijojnë studimet e ciklit të dytë Master në mësuesi apo jo! Po të synojnë të studjojnë Master në mësuesi, edhe për tu pranuar në Bachelor duhet të kenë mesataren 7,5. Nëse nuk synojnë Master në mësuesi, u mjafton mesatarja 6,5! Pra për të njëjtin program Bachelor dy standarte të ndryshme pranimi!
Konkretisht, VKM-ja thotë “Kandidatët, të cilët kanë përfunduar arsimin e mesëm të lartë, minimalisht me notë mesatare 6.5 (gjashtë pikë pesë), mund të aplikojnë edhe në programet e studimit të gjuhëve të huaja dhe në programet e studimit të ciklit të parë “Bachelor”, të cilat japin akses në programet e ciklit të dytë master në fushën e mësuesisë, të përcaktuara në shkronjat “b” dhe “c”, të pikës 1, të vendimit, por këta kandidatë pajisen nga Qendra e Shërbimeve Arsimore me numër të veçantë matrikullimi, i cili nuk i lejon të ndjekin më pas programet e ciklit të dytë master në fushën e mësuesisë.”.
E gjitha është e pa bazë, sepse me studimet Bachelor nuk mund të diplomohesh “Mësues” dhe nuk mund të aplikosh për punë si mësues. Kjo ka mbi 10 vite që është e përcaktuar me ligj. Që nga viti 2011, është përcaktuar me ligj, se vetëm studimet Master diplomojnë mësues dhe të japin të drejtë të zhvillosh edhe Provimin e Shtetit për t’u kualifikuar si Mësues! Me nivelin Bachelor diplomohen vetëm Edukatorët e kopshtit, por jo si mësues! Kaq e thjesht është kjo. Si ka mundësi që pranohet akoma një skemë e tillë për studimet Bachelor, kur praktikisht, me këtë nivel studimesh, nuk diplomohesh dhe nuk mund të bëhesh mësues!
Prandaj, kjo rritje e mesatares në 7,5 për programet Bachelor, të cilët vetëm emërtimin kanë “Mësuesi”, por nuk kanë të drejtë të diplomojnë mësues, është e pabazë dhe thjesht diskriminon maturantët, sidomos të shkollave të zonave më të varfëra të vendit.
Logjikë ka një zgjidhje tjetër: vendosja e notës mesatare shumë më të lartë, të arritur në përfundim të ciklit Bachelor, për të tërhequr më të mirët dhe ekselentët në studimet e Masterit në mësuesi, sepse, cikli Master con në diplomimin e Mësuesve dhe i lejojnë ata të zhvillojnë edhe Provimin e Shtetit për tu licensuar si Mësues.
