Në emisionin e sotëm Opinion, Rama theksoi edhe një herë dëshirën e bashkëpunimit me Partinë Demokratike gjatë mandatit të tretë, pavarësisht kreut që ajo mund të kishte, ofertë të cilën vetë ai, por dhe shumë bashkëpunëtorë të tij, e kanë përsëritur vazhdimisht gjatë fushatës dhe fjalimit të fitores. Sipas Ramës, në këto zgjedhje PD-ja arriti një sasi të konsiderueshme votash, dhe nuk qe ajo e 2017-s, kur, po sipas tij, u masakrua rëndë nga LSI-a.
PD-ja e sotme nuk është ajo e 2017 që e masakroi LSI-ja, tha Rama. Ka shansin tani të hapë një faqe të re për veten e vet. Unë them që në këtë moment PD-ja mund ta bëjë një refresh, por se si, qysh e sa ia dalim, mbetet për t’i parë. Që ia vlen ia vlen.
Ndërkaq, i pyetur për Metën dhe a mund ta amnistonte atë, për të arritur një paqe në komunikimin politik shqiptar, Rama tha se Meta qe dënuar nga populli, dhe nuk mund ta amnistonte askush e asgjë.
Meta është i dënuar nga populli shqiptar, tha Rama. Nuk mund ta amnistojë askush në emër të paqes. LSI nuk është më faktor në asgjë, është një 0 faktor, as X nuk është. Unë besoj gjithmonë tek ndryshueshmëria e gjërave. Besoj shumë tek ajo që thotë Churchill-i, se ai që nuk ndryshon mendim është budalla. Mbase Ilir Meta mund të rishpikë veten e vet, e bëjnë shumë njerëz. Por mua nuk më intereson. Presidenti Ilir Meta është i dënuar nga populli. Asnjë njeri që ka respekt për veten, nuk mund të pranojë president Ilir Metën. Është turp kombëtar, tha Rama
