Ish kryetarja e Parlamentit Jozefina Topalli, njëkohësisht kryetare e Partisë Lëvizja për Ndryshim, në garë për t’u bërë pjesë e Parlamentit që do të dalë pas zgjedhjeve të 25 prillit, ka dhënë sot dorëheqjen nga drejtimi i partisë Lëvizja për Ndryshim, për shkak se nuk arriti të bëhej dot faktor në këto zgjedhje.
Lëvizja për Ndryshim, shkruan Topalli, nuk ia doli për t’u bërë faktor në këto zgjedhje. Por unë dëshiroj të falënderoj stafin, secilin prej kandidatëve që sfiduan klasën politike aktuale; të falënderoj të gjithë ata që besuan.
Duke u larguar nga drejtimi i kësaj Lëvizje, uroj që njerëz patriot dhe të pakorruptuar të vazhdojnë Lëvizjen për reformimin e së djathtës shqiptare, shkruan ajo në faqen e saj zyrtare, duke i dhënë kështu me largimin e saj, edhe një mesazh kreut aktual të PD-së, qendrimi i të cilit në postin ku është, ka hapur shumë diskutime në hapësirën politike shqiptare.
