Një tjetër pyetjeje që kreu i qeverisë Rama i dha përgjigje gjatë lidhjes direkte prej faqes së tij, është ajo se çfarë do të ndodhë pas tërë këtyre prishjeve masive të strukturave prej metali të kafeneve apo lavazhove të shumta.
Rilindja urbane 2.0, deklaroi kreu i qeverisë Rama, kjo do të jetë ajo që do të vijojë më pas, e cila do të ketë në fokus rregullimin e këtyre hapësirave, për t’i kthyer në hapësira të bukura për banorët e qytetarët.
“Mirë shkulim këto”, tha Rama, “por çfarë vjen mbrapa? Atëherë mbrapa vjen Rilindja Urbane 2.0. Jemi duke u përgatitur, kemi ngritur grupe që këto hapësira t’i kthejnë në hapësira të bukura për njëri-tjetritn. Pra pastrojmë tek “21 Dhjetori”, pastrojmë tek “Komuna e Parisit”, tek “5 maji” etj., por nuk mundet dot që gjerat të mbeten ashtu, do të duhet të ndërhyjmë me projekte urbanistike, për të krijuar hapësira të bukura publike. Ata që kanë prona dhe që i përdorin si parkime në mënyrë të paligjshme, janë të ftuar të vijnë e të kërkojnë leje dhe të ndërtojnë parkime. Nuk mund të ndërtojnë brenda pallatit, por mund të ndërtojnë parkime, me dy a tri kate me leje.
Kemi filluar punën me një nga arkitektët më të njohur në botë, bërë i famshëm me superblloqet e Barcelonës, dhe do të futet dhe ky komponent. Por, është shumë e rëndësishme të kemi durim, të bashkëpunojmë që secili të bëjë denoncimin e vet, e që secili ta ketë të qartë që këtu nuk do kete asgjë selektive. Dhe si nuk do lejohet? Duke bashkëpunuar komuniteti me autoritetet”.
