Në konferencën me mediat mbi progres-raportin e KE për Shqipërinë gjatë 2021-it, kreu i qeverisë Rama tha se problemi i mos-hapjes së negociatave ishte tek Bashkimi Evropian, e jo tek Shqipëria.
Në fakt, tha Rama, Shqipëria i ka arritur rezultatet që duhej të arrinte. Është Bashkimi Evropian që nuk po arrin rezultat, sepse Këshilli Evropian u ka thënë se duhet të ulemi në tavolinë dhe nuk bëhen për t’u ulur. Shqipëria i ka arritur rezultatet, dhe, e thashë, rezultatet e arritura janë të rëndësishme këtu. Këto përparime nuk i bëjmë se do shkojmë do marrim provimin atje. I bëjmë që ato të qëndrojnë këtu, që Shqipëria të bëhet përherë e më e mirë, dhe këto janë rezultate që pavarësisht seç ndodh ne aspektin formal atje, janë rezultate të arritura këtu, dhe kjo është e rëndësshme të mos harrohet. Në këtë proces BE është e pazëvendësuëshme, pikërisht sepse përmes Komisionit, na ndihmon me instrumentat, na ndihmon me dijen e madhe që ka mbledhur në gjithë historinë e vet, se si bëhen këto punë që kanë të bëjnë me ngritjen e ngrehinës së shtetit, na ndihmon edhe me gjykimet e veta kritike, na ndihmon edhe me financimet e veta, kështu që rezultatet duhet t’i shohim në dy anë, vazhdoi Rama. Por nëse na duhet të duhet të shohim në thonjëza, se kush nuk ka arritur rezultate, është BE që nuk ka arritur rezultate, që ka tre vjet që e merr nga komisioni të zezë mbi të bardhë, se Shqipëria duhet të ulet në tavolinë për të filluar bisedimet për anëtarësim, dhe nuk paraqiten. Pse nuk paraqiten, i kemi shpjeguar shpesh herë, përfundoi kreu i qeverisë Rama.
