Ka reaguar pas ankesës së një biznesmeni se po i marrin me pa të drejtë parcelën e tij të plazhit, edhe zëdhënësja e PD-së Ina Zhupa, e cila në një status të vetin e cilëson krejt operacionin e ndërmarrë nga Policia e Shtetit, si një mënyrë për shpërblyer ata që blenë votat gjatë zgjedhjeve ose ata që japin miliona lekë rryshfet për shezlonët në plazhet publike.
Konflikti per shezlongët në bregdet shpërtheu në mënyrë tragjike në Velipojë, por rreziku i përsëritjes është i njëjtë kudo në Shqipëri, shkruan Zhupa. Në video është qytetari Artur Memsuri, që me lot në sy, tregon se qeveria i hoqi papritur të drejtën e përdorimit të plazhit në Ksamil, për të cilin ka 20 vjet që paguan rregullisht taksat. Njësoj ndodhi edhe në Velipojë, sepse qeveria e trajton pasurinë publike si plaçkë private për të shpërblyer ata që blenë vota në zgjedhje ose ata që japin miliona lekë rryshfet për shezlonët në plazhet publike.
Lotët e qytetarit të ndëshkuar në mes të sezonit për të favorizuar dikë me lidhje me pushtetin janë mesazhi se qeveria është vetë nxitësja e konflikteve, që çojnë deri në vrasjen e njërëzve me njëri-tjetrin për territor në plazhe.
Përgjegjësia e Edi Ramës dhe Blendi Klosit nuk mund të fshihet pas aksioneve qesharake të policisë. Korrupsioni qeveritar dhe favorizimet elektorale me hapësirat publike në plazhe janë në zemër të konfliktit, që godet qytetarët e ndershëm!
Ndërkaq, vetë qytetari Memsuri shprehet se ka shumë vite që e përdor plazhin kundrejt të gjitha rregullave, pagimit të taksave e madje edhe të gjobave, e se nuk e kupton se përse tani atë duhet ta përdorë në vend të tij një tjetër, dhe jo ai që ka vite që e përdor.
I kam paguar të gjtiha taksat, detyrimet dhe gjobat që kam ngrenë, thotë ai. Vjen dikush i panjohur, paraqitet me letra dhe e merr. Ok, ta gëzojë. Më thuaj me cfarë të drejte po e merr ai, pa pasur asnjë lloj objekti mbrapa, pa pasur asgjë gjë. Si mund ta marri? I lutem Kryeministrit, t’i shohë këto gjëra se na fut në sherre të mëdha. Ministri i Turizmit të vëjë dorë. Si ka mundësi të bëhen këto gjëra?
