Kanë shpëtuar ditën e sotme tri të rinj ngecur nga Kanionin e Gjipesë që mbrëmjen e djeshme, të moshave 21, 18, dhe 15, të cilët qenë futur thellë në të, për të eksploruar zonën.
Sipas njoftimit të Policisë, kjo e fundit ka marrë mbrëmë njoftimin për ngecjen e tyre dhe vetëm ditën e sotme ka bërë të mundur shpëtimin e të rinjve, njëri prej të cilëve është dëmtuar teksa është përpjekur të dalë prej kanionit.
Tri të rinjtë janë në gjendje të mirë shëndetësore, dhe i lënduari ka marrë ndihmën e parë për këmbën, duke qenë jashtë rrezikut për jetën.
Njoftimi i plotë i Policisë:
Shërbimet e Stacionit të Policisë Kufitare Dhërmi dhe ato të Komisariatit Himarë në bashkëpunim me FNSH-në e Fierit dhe forcat zjarrëfikse, i vijnë në ndihmë tre turistëve që kishin ngecur në Kanionin e Gjipesë.
Mbrëmjen e djeshme, Policia ka marrë njoftim se tre turistë, duke eksploruar territorin në Kanionin e Gjipesë, Himarë, për shkak të terrenit të vështirë e kanë patur të pamundur daljen e tyre nga Kanioni.
Njëri prej tyre është dëmtuar duke u përpjekur të dalë nga Kanioni.
Menjëherë kanë nisur kërkimet nga shërbimet e Policisë Kufitare, në bashkëpunim me shërbimet e Komisariatit të Policisë Himarë, për gjetjen e tyre.
Pas 1 orë kërkimesh intensive, shërbimet e Policisë i kanë gjetur dhe me ndihmën e FNSH-së dhe forcave të zjarrëfikses, kanë bërë të mundur nxjerrjen nga kanioni të tre turistëve të moshave 21 vjeç, 18 vjeç dhe 15 vjeç, të cilët ndodhen në gjendje të mirë shëndetësore. Shtetasi që ka patur lendime në kembë ka marrë ndihmën mjeksore në spital dhe ndodhet jashtë rrezikut për jetën.
