Kreu i qeverisë Rama është takuar sot me një grup grash përfaqësuese të protestuesve të lagjes 5 maj, të cilët vazhdojnë e përplasen me Bashkinë e Tiranës, për shembjen e padrejtë të banesave të tyre, dhe për mos dhënien e hapësirave që meritojnë, në ndërtimet e reja që do të bëhen. Në takimin me tri gratë në ambientet e Kuvendit të Shqipërisë, Rama këmbënguli se ato do të marrin vetëm atë që u takon, e po ashtu, përkundër asaj që pretendojnë banorët se Bashkia ua kanë prishur shtëpitë pa i njoftuar, se ata janë njoftuar prej saj qysh në qershor të 2021-it.
Por ne në rrugë nuk ju lejm, u tha Rama tri grave, nuk ju lejm! Por ëfarë do të bëjmë ne aty? Ne do të bëjmë një lagje të re, që njerëzit të jetojnë si njerëz, e jo si kafshë në mes të plehërave, sepse për ne gjëja më e rëndësishme janë fëmijët, por fëmijët duhet të rriten në një lagje që i ka gjërat afër, kopështin, cerdhen, etj.
Ne nuk po ju prishim juve banesat, që t’ía japim dikujt që të bëjë zhvillim privat. Ne aty do ndërtojmë lagje ku do të strehojmë të gjithë ata që janë goditur nga tërmeti, që kanë mbetur në rrugë pa shtëpi, dhe do strehojmë edhe të gjithë ju, komplet. Në kohëra të tjera do t’ju kishin thënë a ju tha njeri të ndërtoni atje? Jo? Epo ikni! Kurse unë po ju thëm, sa e kishe shtëpinë ti, tre katëshe, do marrësh edhe ti, edhe tre djemtë nga një apartament. Në qoftëse të pëlqen merre, në qoftëse jo, mos e merr”, tha Rama..
Mes të tjerave në debatin me tri gratë që këmbëngulnin se ai mbështeste Bashkinë dhe jo ata, e se ajo nuk thoshte të njëjtën gjë si Rama, kreu i qeverisë sqaroi se apartamentet do t’i merrnin me letra të rregullta e se qeraja, derisa ato të përfundonin, do t’i paguhej nga shteti.
Më shumë se kaq, nuk kam ç’t’ju ofroj më, e përfundoi ai bisedën me tri gratë, duke i përcjellë deri tek dera, ndërkohë që ato vazhdonin debatin të nxehura.
