Kryeministri grek Kyriakos Mitsotakis ka bërë me dije për publikun ditën e hënë, se vaksinimi i personelit shëndetësor në Greqi, do të jetë i detyrueshëm nisur nga shtatori, sepse vendi vazhdon të ketë ende probleme me pandeminë e koronavirusit.
Nisur nga një shtim i të prekurëve prej virusit në vend, Mitsotakis deklaroi se nga 1 shtatori, të pavaksinuarëve do t’u ndalohet hyrja nëpër ambientet e mbyllura, e po ashtu edhe personeli i pavaksinuar i shtëpive të pleqëve, do të pezullohej nga puna, nisur që prej 16 gushtit.
Të gjitha vendet e mbyllura, përfshi edhe strukturat argëtuese apo hapësirat sportive, do të pranojnë vetëm njerëz të vaksinuar, ndërkohë që një aplikacion dixhital që do të instalohet, do konfirmojë vaksinimin, tha Mitsotakis.
Ndër të tjera ai sqaroi edhe se vendet e argëtimit nuk do mund të mikprisnin njerëz në këmbë gjatë verës, kurse kafenetë dhe restorantet, të cilat tashmë lejohen vetëm në ajër të hapur, mund të shtojnë edhe më tavolina jashtë.
Vendi nuk do të mbyllet për shkak të sjelljes së disa personave, nënvizoi kryeministri grek, teksa shtoi se qëllimi i qeverisë qe të vaksinonte të paktën 70% të popullësisë së rritur të vendit.
Greqia ka njohur ditët e fundit një rritje të numrit të të prekurëve, duke shënuar brenda 24 orëve 10 jetë të humbura për shkak të virusit covid-19.
