Në takimin me kreun e qeverisë Edi Rama, Komisionieri për Zgjerimin në BE, Oliver Varhelyi, e vuri theksin tek ndihma e pandërprerë që Europa i ka dhënë Shqipërisë gjatë periudhës së pandemisë, e po ashtu edhe tek vaksinimi i fqinjëve e ai i Ballkanit Perëndimor, si prioritet i Bashkimit Evropian, për t’i dhënë fund sa më parë pandemisë.
Për ne, tha Varhelyi, është prioritet që fqinjët tanë të kenë vaksina, të bëhet vaksinimi, dhe prandaj, besoj që Ballkani Perëndimor është edhe më i rëndësishëm për këtë arsye, dhe ne shpresojmë që me këto vaksina, ju do të siguroni jo vetëm sektorin e Shëndetësisë dhe vaksinimin e tyre, por edhe vaksinimin e grupeve më të cënueshme.
Shqipëria, shpjegoi Varhelyi, do të marrë 145 doza të vaksinës Pfizer, të cilat jo vetëm që po i sjell këtu BE, por janë edhe 100 % të financuara nga BE. Këto janë një donacion nga BE, tha ai, pra një dhuratë nga ana jonë për ju nga ne, nga ana jonë, nëse mund ta quajmë kështu, për t’ju treguar që ju keni rëndësi për ne, për t’ju treguar interesin tonë, dashamirësinë tonë.
Varhelyi theksoi se kjo ndihmë nuk do të kishte qenë e mundur pa mbështetjen e qeverisë austriake, dhe se ky ishte pikërisht momenti i duhur sipas tij, për ta nisur vaksinimin në Shqipëri e po ashtu edhe për ta fuqizuar atë më tej.
Një gjë që dua ta bëj të qartë, tha Varhelyi, është që ne nuk do ta kishim bërë këtë pa miqtë tanë austriakë dhe qeverinë austriake. Ky lloj bashkëpunimi tregon edhe punën në ekip në Europë, dhe tregon se çfarë mund të arrijë BE-ja në rast se bëhemi bashkë. Ndoshta ju e mbani mend, që ne e kemi ndihmuar Shqipërinë që prej fillimit të pandemisë, që prej marsit të vitit të shkuar. Jemi përpjekur t’ju ndihmojmë me gjithçka që kishim mundësi, me maska, me respiratorë, me ambulanca, me njësi të reanimacionit, me përmirësimin e spitaleve apo edhe me ndihmë financiare, ekonomike apo makrofinanciare, kurse tashmë po sjellim dozat e para të vaksinës, sepse ky është momenti jo vetëm për ta nisur vaksinimin, por edhe për ta fuqizuar atë më tej. Asnjë prej nesh nuk do të jetë tërësësisht i sigurt, nëse nuk vaksinohen të gjithë, dhe ne tregojmë qe jemi të interesuar për sigurinë dhe shëndetin e plotë të qytetarëve shqiptarë, përfundoi ai.
