Si një nga proceset më të vështira të ndërmarra në fushen e financave deri më tani, fiskalizimi ka ngjallur tejet diskutime, edhe për vetë mënyrën e zbatimit të kësaj politike finaciare, e cila nuk ka nevojë vetëm për një financier si deri më tani, por edhe për një program kompjutërik shtesë, i cili hera-herës edhe i ngatërron të interesuarit, për të shkuar në udhën e duhur, e pse jo, duke u hapur udhë edhe abuzimeve me to.
MetropolPost u interesua pranë Drejtorisë së Përgjithshme të Tatimeve dhe burime nga ky institucion i konfirmuan edhe një herë, hapat që nevojitet të ndërmarrë një biznes i madh, për të kryer me sukses procesin e fiskalizimit.
Sa më poshtë po rendisim hapat që nevojiten, për të shkuar nga marrja e certifikatës prej AKSHI-t, deri në përdorimin e programit të fiskalizimit
Elemente të domosdoshme: kompjuter & internet & printer (jo në të gjitha rastet).
Hapi i parë: marrja e çertifikatës elektronike nga AKSHI përmes e-albanias.
Së dyti, instalohet në kompjuter një prej programeve të licensuara prej Tatimeve, ku gjenden të gjitha subjektet e licensuara prej Tatimeve dhe AKSHI-t për të ofruar programet softuerike të fiskalizimit.
Së treti, financieri ose ai që do ta përdor programin, duhet të sqarojë më kompanitë softuerike, programin e financës që përdor e po ashtu edhe natyrën e biznesit, në mënyrë që të marrë softuerin që i nevojitet dhe jo gjëra shtesë që nuk i duhen.
Së katërti, kompanitë softuerike instalojnë programet dhe në shumicën e rasteve, instruktojnë edhe përdoruesin e tij (financierin apo atë që do të presë faturat), si ta përdorë këtë program.
Në këtë pikë, procesi i fiskalizimit është përmbyllur dhe mjafton vetëm përdorimi i sistemit, sa herë kryhen shitje-blerje, të cilat hidhen në softuerin e instaluar, i cili, nga ana e tij, i kalon direkte në e-Albania dhe tatimet.
Më pas printohet edhe fatura, e cila, po sipas burimit të tatimeve, edhe mund të mos jetë nevojitet, nëse veprimet kryhen bankë me bankë.
Është e paqartë në këtë pikë vetëm se sa kushton një prej programeve softuerike që nevojiten për t’u instaluar, kjo për shkak se, kompani të ndryshme, ofrojnë edhe programe të ndryshme, në varësit të natyrës dhe veprimeve të biznesit përkatës.
