Ka tërhequr vëmendjen sot me deklaratën e tij në rrjetin social fejsbuk, anëtari i kryesisë së PD-së Fatbardh Kadilli, i cili ka kërkuar dorëheqjen e menjëherëshme të Lulëzim Bashës, dhe ka shpalluar kandidaturën për kre të Partisë Demokratike.
Në statusin e tij të gjatë, Kadilli fton demokratët të analizojnë motivet e humbjes, duke ia faturuar atë më së shumti kreut të PD-së Basha, i cili në gjykimin e Kadillit, siç do gëzonte frutet e fitores, duhet të paguajë edhe koston e humbjes.
Partia jonë dështoi në krijimin e mekanizmave dhe të besimit popullor për t’u përballur me të keqen, shkruan Kadilli në statusin e tij. Me makinerinë propagandistike, financiare dhe abuzuese të pushtetit. Ne nuk arritëm ta frymëzojmë mbështetjen e gjerë opozitare, dhe as elektoratin gri, për t’i dhënë votës forcën dhe vlerën që ka në demokraci. Ne nuk arritëm që të kapërcenim presionin, blerjet, makinacionet, joshjet dhe hilet e sistemit të ngritur nga ky pushtet. Ne nuk arritëm t’a kthenim në frymë ndryshimi zhgënjimin popullor. Si rrjedhojë jemi përballë këtij rezultati. Të cilin nuk e shmangim dot as me fajësim të njëri-tjetrit, as me taktika kalimtare, dhe as me demonizim të kundërshtarit.
Duke ndjerë keqardhje dhe solidarizim të plotë me sakrificën e demokratëve dhe strukturave të partisë gjatë një opozite 8 vjeçare, jo pak here edhe të pabusull, kërkoj largimin e menjëhershëm nga funksionet drejtuese dhe dorëheqjen e Lulzim Bashës. Jo vetëm për faktin se partia gjendet sot përballë humbjes së tretë, por më shumë se kaq, ky është një model që ka shterruar. Me anë të këtij akti, ai jo vetëm njeh përgjëgjësitë për rezultatin, por edhe respekton një standard të vendosur në Partinë Demokratike nga paraardhësi dhe themeluesi i kësaj force, Sali Berisha.
Gjithashtu, shpall sot kandidimin për detyrën e Kryetarit të Partisë Demokratike. Iu bëj thirrje të gjithë demokratëve të mos dorëzohen. Ne jemi parti e vlerave dhe forcës; trashëgimtare e Lëvizjes së Dhjetorit, besimtare e kredos: ‘e duam Shqipërinë si gjithë Evropa’, ka shkruar mes të tjerave Fatbardh Kadilli në statusin e tij.
