“Kristali dhe beteja me emoxhët” është një gati-përrallë me subjekt nga ditët e sotme. Kristali, një vogëlushe 9 vjeçare, ka një shqetësim të vazhdueshëm. Shokët e shoqet e saj nuk shprehen e as shkruajnë me fjali të plota, por zgjedhin të komunikojnë me shkurtime, emoxhë dhe fjalë anglisht, duke rrezikuar kështu bjerrjen e gjuhës shqipe. Një ëndërr i rrëfen asaj të ardhmen e trishtë që i pret fëmijët nëse gjuha humbet, ndaj ajo i vihet punës për ta mbajtur gjallë atë e pasuruar. Teksa përpiqet të gjejë një mënyrë për t’ia arritur qëllimit të vet, ajo jo vetëm mëson, por edhe argëton bashkëmoshatarët e saj, duke u ofruar kështu edhe një sërë gjeagjëzash tepër argëtuese.
Grupmosha e leximit të këtij libri është në fakt nga 5 deri 14 vjeç, por tematika natyrisht përfshin breza të tërë, të cilët, duke e lexuar, do të marrin ndoshta një shtysë për ta ruajtur e pasuruar shqipen, një prej gjuhëve më të vjetra indo-evropiane.
“Kristali dhe beteja me emoxhët”, është në fakt vazhdimi i aventurave të vogëlushes Kristal, e cila, në vëllimin e parë, “Kristali dhe interneti çudimadh” përpiqet t’u japë shokëve e shoqeve (në klasë të parë), një mesazh tejet të rëndësishëm: që internetin duhet ta përdorim vetëm për punë, e jo të humbasim brenda tij duke harruar jetën e vërtetë. Historia që i rrëfen i ati, risjell për të tërë trishtimin që pllakosi njerëzimin pasi u izolua vetëm tek gjërat onlajn, një izolim që, përtej pritshmërive, nuk solli ndonjë zhvillim dhe aq për t’u shënuar në botën e tij të brendshme.
Mesazhet e dy librave për fëmijë, duket se janë thelbësore për kohërat e sotme, ku mjaft elementë që formësojnë identitetin e fëmijëve, duke se po vijnë duke zbehur, e duke i lënë fëmijtë pa mekanizmat e duhur për t’u formësuar e përthyer dijen.
