Në një konferencë për mediet mbajtur në fillim të janarit mbi situatën e kovidit në vend, Akademia e Shkencave, përmes akad. Genc Sulçebe, ka deklaruar se 50% e Tiranës ka fituar tashmë imunitet.
Sipas informacioneve nga vetë faqja zyrtare e Akademisë së Shkencave, në muajin prill 2020, janë nisur përpjekjet për konceptimin dhe realizimin e një studimi sero-epidemiologjik të prevalencës së Covid-19 në popullatën shqiptare, dhe pas miratimit nga kryesia e Akademisë së Shkencave të Shqipërisë të projektit “Studimi sero-epidemiologjik i gjendjes imunitare ndaj virusit Sars-CoV2 në popullatën shqiptare”, me vendim nr. 33, në muajin maj të 2020 -s, të paraqitur nga komisioni i mjekësisë, nisi dhe faza e parë e studimit, që konsistoi në aplikimin e testit serologjik të antitrupave anti-Sars-Cov-2 në një kategori të kufizuar të popullatës, me qëllim për të siguruar një informacion paraprak dhe për të vlerësuar mundësinë e zgjerimit eventual të studimit në një kampion më të madh popullate në Tiranë.
Sipas studimit, në fazën e parë imuniteti i verifikuar ka rezultuar në kufijtë e 6-7 për qindshit, kurse në fazën e tanishme, të dhënat çojnë në përfundimin se gjysma e popullatës së Tiranës, 50 për qind e saj, ka fituar imunitet.
Por, theksojnë ata, ka dallime të dukshme me rajonet e tjera të Shqipërisë.
