Agjencia e Barnave Amerikane FDA, ka miratuar këtë të hënë, përdorimin e vaksinës Pfizer covid-19 në grupmoshat nga 12-15 vjeç.
Kjo është e para vaksinë deri më tani, që autorizohet të përdoret tek të rinjtë adoleshentë. Më parë, ajo lejohej të përdorej tek personat nga 16 e sipër, ndërkohë që vaksinat e tjera anti-covid, Moderna dhe Johnson &Johnson qenë të autorizuara të përdoreshin tek personat mbi 18 vjeç.
Për të dhënë miratimin, FDA rishqyrtoi të dhënat e paraqitura nga kompania farmaceutike Pfizer, e cila kishte deklaruar në fund të marsit, se në një studim klinik me mbi 2.260 fëmijë të moshës nga 12-15 vjeç, vaksina kishte rezultuar e vlefshme 100% dhe e përballueshme më së miri.
Sipas deklaratave të vetë Agjencisë, FDA shqyrtoi gjithashtu edhe përgjigjet imunitare të disa prej fëmijëve të vaksinuar, duke i krahasuar ato me përgjigjet imunitare të adoleshentëve dhe të rriturëve më të mëdhenj vaksinuar më parë, dhe sipas tyre, reagimi i këtyre grupmoshave ndaj vaksinës, kishte qenë shumë i mirë.