Teksa kreu i qeverisë së Kosovës Albin Kurti, ka deklaruar ditën e hënë në Parlamentin Kosovar, zbatimin e vendimit të Ministrisë së Punëve të Brendshme, për pajisjen me targa të përkohshme kosovare, të të gjitha automjeteve serbe që hyjnë në Kosovë, si dhe moslejimin e atyre që nuk janë të pajisura me të, mjaft serbë janë mbledhur për të protestuar në pikën e kalimit të Jarinjës, duke kërkuar heqjen e një vendimi të tillë ana e qeverisë së Kosovës.
Në fjalën e tij mbajtur në Parlament, teksa tregoi përpara të gjithëve tabelat e përkohëshme serbe që kosovarët janë të detyruar të mbajnë kur hyjnë në Serbi, Kurti theksoi se zbatimi i këtij vendimi, që i detyron të gjitha automjetet me targa serbe, që hyjnë në territorin e Republikës së Kosovës, të pajisen me targa të përkohshme, “nuk ka për qëllim t’i cenojnë të drejtën e lëvizjes së lirë qytetarëve serbë apo të provokojnë çfarëdo destabilizimi. Sikurse dje, sot por edhe nesër, qytetarët serbë do të lëvizin lirshëm, të sigurt dhe të mbrojtur nga ligji dhe Kushtetuta e Republikës së Kosovës dhe nga unë si kryeministër i saj, tha Kurti. Sot, vetëm po fillon zbatimi i një marrëveshjeje për të cilën është pajtuar Serbia me ndihmën e Bashkimit Evropian, sepse liria e lëvizjes është edhe e drejtë njerëzore e civile por edhe vlerë evropiane […] Barazia për neve është vlerë të cilën e zbatojmë në praktikë dhe le të angazhohemi së bashku për të mirën tonë të përbashkët. Në fund më lejoni vetëm të tregoj se si ky trajtim i barabartë bëhet me këto tabela të përkohshme, të cilat nuk janë dëshirë e jona por imponim nga pala tjetër. Pra, këto janë tabelat tona që janë të përkohshme për ata të cilët vijnë me tabela të tjera, ndërkaq ka 10 vjet që qytetarët tanë paguajnë për këto tabela që janë poshtë. Ne nuk i duam as këto, as këto, mirëpo derisa të ketë këso, do të ketë edhe këso, tha Kurti, teksa tregoi në Parlament targat që qytetarët e Kosovës duhet të mbajnë kur shkojnë në Serbi, duke u kërkuar qytetarëve serbë që “ta kuptojnë drejt se sot nuk po ndodhë asgjë e jashtëligjshme apo diskriminuese ndaj tyre”.
