Ka qenë një mesazh i ambasadores Yuri Kim në celularin e Metës gjatë transmetimit live në bashkëbisëdim me gazetarët e SyriTv, ai që ka shpërthyer një reagim të fortë të Presidentit ndaj ambasadores amerikane, e cila, gjatë ngjarjeve të fundit në vend, dhunës verbale e fizike në emër të mbrojtjes të votës, u ka bërë shpesh thirrje palëve për qetësi dhe menaxhim të situatës.
Sipas asaj që rrëfeu Meta në studio, Yuri Kim i kishte shkruar një mesazh, ku i thoshte të mos e zinte më në gojë muhabetin e cfurqeve ditën e zgjedhjeve, gjë që provokoi në fakt një rrëfim të detajuar të presidentit Meta, mbi marrëdhënien me ambasadoren amerikane dhe se si i shihte ai, ndërhyrjet e saj.
Më tha që duhet të pushosh me këtë muhabetin e cfurqeve, dhe unë i thashë duhet të ndalosh duke mbështetur Ramën për këtë muhabetin e zgjedhjeve. Kaq, rrëfeu Meta. Dhe do t’i them edhe gjëra të tjera. Duhet të kërkojë zbardhjen e çështjes së Elbasanit urgjentisht ajo, kaq. Dhe ka bërë shumë gabim që ka mbështetur Edi Ramën të prishë marrëveshjen e 5 qershorit, që e mbështetën Shtetet e Bashkuara dhe që u nënshkrua në tokë amerikane. U kam thënë ndërkombëtarëve ndërhyni tani, jo të na thoni ditën e hënë u prishën zgjedhjet epo tani gjeni gjuhën. Jo! Se zgjedhjet nuk po i prish opozita, nuk po i prish shteti, po i prish pozita.
Ndër të tjera, në transmetim live, Meta tha se ambasadorja Kim kishte ndërhyrë tek ai për favor të Edi Ramës, duke i kërkuar jo rrallë herë lëvizje që binin ndesh me vendimet e Komisionit të Venecias, apo Kushtetutën e Shqipërisë.
Po i them ambasadores atë që i kam thënë herën e parë në zyrë, tha Meta. Ajo është përgjegjëse për marrëdhëniet e Shqipërisë me Amerikën, jo për marrëdhëniet mes Serbisë dhe Amerikës. Ambasadorja amerikane nuk më tregon dot mua, seç duhet të bëj unë për llogari të Edi Ramës. Ambasadorja amerikanë nuk me merr dot mua në telefon, për llogari të Edi Rames, e të më thotë një ditë para mbledhjes së KLD-së, që të pranoj që të kthehet Dvorani sërish në KLD, pasi Venecia e tregoi shumë qartë çfarë është Dvorani. Dhe ka bërë gabim, se ma ka kërkuar për llogari të Edi Ramës, se Amerika mbështeti raportin e Venecias. Më mori në telefon për Dvoranin, se kisha bërë një letër që binte në kundërshtim me emërimin e tij, me Venecian. Do ta publikoja më pas. Ajo më thotë mua, mos ndërhy, sepse dimë ca gjëra për ty. Ambasadorja, i thotë Presidentit! Unë i kam thënë nuk e shkel Kushtetutën, nuk e shkel marrëveshjen që kemi bërë bashkë, dhe atë letër që do ta publikoja më pas, i thashë do ta publikoj në orën 10, para mbledhjes, dhe ça keni për mua, publikojeni, unë Kushtetutën nuk e shkel!
Prandaj, e dashur ambasadore, që të mos kemi rastin e Kirgistanit, e ndiko tek ai i sëmuri psiqik, që të mos provokojë më as Presidentitn, as popullin, edhe që të shpëtojmë këtë proces zgjedhor që është vendimtar për Shqipërinë jo për 4 vjet, por për 100 vitet që vijnë. SHBA-të nuk kanë asgjë më Ilir Metën, se Meta është politikani më luajal ndaj tyre në 30 vjet. Janë qarqe të korruptuara, janë lobingje që i paguan Serbia edhe atje, edhe në vende të tjera, të cilët përdorin përfaqësues të Amerikës kundër Ilir Metës.
Ajo, tha Meta, ose të pranojë kush ia ka keqpërkthyer ça kam thënë unë, ose të pranojë që është përfaqësuese e lobeve të caktuara të Amerikës. Unë mendoj se kush mbështet një mandat të tretë të Edi Ramës, duke prekur zgjedhjet është i korruptuar. Fitoi Rama, unë i jap mandatin tim si President, ama po nuk ia dha populli shqiptar, po preku një votë ai, ta dijë ambasadorja dhe populli shqiptar, këtu do të bëhet hataja, përfundoi ai.
