Më shumë se 70 ligjvënës britanikë kanë shprehur kundërshtimin e tyre ndaj futjes së të ashtuquajturave pasaporta vaksinimi, që qeveria po vlerëson t’i vërë në përdorim, për të ndihmuar hapjen e ekonomisë, si dhe lirimin e masave kufizuese vënë për shkak të covid-19.
Qeveria angleze po shqyrton idenë që t’u kërkojë njerëzve të tregojnë dëshminë e vaksinimit, në mënyrë që të mund të futen më pas në hapësirat e populluara, si bare apo ngjarjet sportive. Kryeministri Boris Johnson, ka pohuar tashmë se për udhëtimet ndërkombëtare, do nevojitet me gjasa një çertifikatë e tillë, dhe se kombinimi i këtyre faktorëve të imunitetit, pra kush e ka kaluar, kush ka bërë vaksinën, apo testi-negativ i covid-19, do nevojitej për të vijuar udhën drejt hapjes.
Disa prej anëtarëve të partisë së tij konservatore, e po ashtu edhe grupet e të drejtave civile, kanë reaguar duke theksuar se një gjë e tillë ka karakter diskriminues e përçarës mes njerëzve, duke këmbëngulur kështu në mos marrjen e një vendimi të tillë.
Sipas planit qeveritar anglez, për daljen nga pandemia, pabet mund t’u shërbejnë njerëzve në ajër të hapur deri në fund të muajit mars, për të vijuar me një lehtësim të kufizimeve në mes të majit, përpara se të gjitha masat të hiqen deri në fund të qershorit, bëjnë të ditur mediat britanike.
