Teksa e quajti spitalin rajonal memorial të Fierit, “gur themeli sa i përket ndërtimit të modelit të ri të autonomisë spitalore në Shqipëri” ministrja e Shëndetësisë Manastirliu ftoi profesionistët të bëheshin pjesë e këtij spitali, i cili do të menaxhohet nga një ekip shqiptaro-turk, do ketë 150 shtretër, 19 shërbime dhe njësi klinike ambulatore, e që do mbulojë shërbime të spitalit terciar për qytetarët shqiptarë.
Ashtu siç kemi vendosur standardin punësim me meritë e transparencë, tha Manastriliu, në portalet ‘Mjekë dhe infermierë për Shqipërinë’, edhe për këtë projekt, nisim nga dita e sotme procedurën për rekrutimin e profesionistëve që do të punojnë në spitalin memorial të Fierit, si dhe për stafin administrativ, dhe atë mjekësor.
Mbi 300 do të jenë punonjësit që do të punojnë në këtë spital, në një model të ri operimi, që do të konsolidohet gjatë vitit të parë të funksionimit të tij mbi bazat e autonomisë spitalore, që më pas do të shtrihet edhe në spitalet e tjera. Mbi 50 profesionistë do të vijnë nga Turqia, staf administrafiv manaxherial dhe mjekësor, në funksion të transmetimit të dijeve dhe ndërtimit të modelit të ri, në bazë të së cilit do të qëndrojë transparenca dhe rritja e cilësisë së shërbimit.
Gjatë fjalës së saj, ministrja e Shëndetësisë, theksoi se modeli i menaxhimit të spitalit rajonal të Fierit, ai i autonomisë spitalore, është një model i cili do të shtrihet në të gjithë Shqipërinë.
