Në një konferencë për shtyp me gazetarët, kreu i Kadastrës Shqiptare Artan Lame, u shpreh se Kadastra e sotme Shqiptare ishte një histori suksesi. Sipas Lames, paketa ligjore e akteve të Kadastrës, pra ligji i ri për Kadastrën në Republikën e Shqipërisë dhe ligji për proceset tranzitore të pronësisë në Shqipëri, janë dy kolonat thelbësore të pronës në vendin tonë, të cilat edhe pse nuk i kanë dhënë ende rezultatet dhe efektet, po japin shenja jashtëzakonisht pozitive.
Legalizimet, janë betejë e fituar, u shpreh Lamja, që nuk janë më kalë beteje për partitë politike nëpër fushata. Për të njëjtën periudhë kohe 2006-2013 dhe 2014- 2020, ne kemi 10-fishin e numrit të legalizimeve. Beteja tjetër e fituar në këtë fushë, legalizimi i pallateve të braktisura nga pronarët, janë një kategori shumë e gjerë që përmblidhen me këtë term, se bëhej fjalë vetëm për 6 pallate të legalizuara para 2014-‘15, dhe për 800 të bëra pas atij viti, pra flasim për rreth 40 fish të pallateve të legalizuara.
Veç këtyre, kreu i Kadastrës renditi edhe një sërë suksesesh të tjera, mes së cilave edhe
- Formalizimin e ndërtimeve pa leje, rritur me 11 fishin;
- Kohëzgjatjen e shërbimit të qytetarëve, e ulur me 3.5 herë;
- Aplikimet pa përgjigje ndaj qytetarëve, ulur me 12 herë;
- Kohëzgjatjen e vonesave të theksuara ndaj qytetarëve, ulur me 4 herë;
- Procese gjyqësore të fituara, rritur me 20%,
të cilat Lame ia atribuoi bashkimit të institucioneve në fushën e pronës në një institucion të vetëm, e po ashtu edhe kalimit të legjislacionit të pronës, në një ligj të vetëm, në atë 20.20.
Në katër vitet në vijim, u shpreh Lame, Kadastra ka disa sfida të mëdha:
- Rregjistrimi i tokës në fshat;
- Dixhitalizmi i dokumenteve të pronësisë;
- Procesi i rregjistrimit për herë të parë të pasurive;
- regjistrimi i pronës shtet;
Për pikën e parë, rregjistrimin e tokës në fshat, Lame sqaroi se 2020- a, qe mbyllur 18. 700 çertifikata toke të lëshuara në fshat, gjë që e cilësoi po histori suksesi të jashtëzakonshëm, duke qenë se në 2019 qenë dhënë 8000 të tillla, dhe nga 2018-a e poshtë, nuk ia vlente t’i përmendje, për shkak se numrat qenë tejet të pakët. Sa i takonte dixhitalizmit, Lame pohoi se ky ishte një proces i nisur, që siguroi edhe mbarëvajtjen e Kadastrës gjatë pandemisë: Kemi një mori problemesh me shërbimet onlajn, sqaroi ai, disa probleme të brendshme organizative, disa të sistemeve që janë shumë të vjetra, disa probleme të përgatitjes së stafeve, se tani duhet të jetë thjesht jurist, inxhinier, topograf, por duhet të marrë vesh edhe nga elektronika, se duhet të dijë të përdorë programet, po është absolutisht sukses.Pikën 3, procesin e rregjistrimit për herë të parë të pasurive, Lame e cilësoi si një sfidë: Shqipëria e ka rifilluar këtë proces më 1994-n dhe ende nuk e ka përmbyllur. Është sfidë e jona të përmbyllim procesin e regjistrimit fillestar të pasurive, 4 milionë e 200 mijë që ka Shqipëria dhe hedhja e tyre në sistem. Lidhur me rregjistrimin e pronës shtet, Lamja tha se kjo do ta shpëtonte më në fund atë nga abuzimi, duke u kthyer kështu në një formë mbrojtjeje të mosvjedhjes së saj.
