Këngëtarja me zërin aq të ëmbël, Marsela Çibukaj, u ka ndërmendur sot të fansave të saj, të dielat e këndshme nga koha e fëmijërisë, ku ngrohtësia e familjes, detajet bëjnë diferencën e kohës, dhe personazhi aq i dashur i Nils Holgersonit, na kthejnë të tërëve nga pak në kohë, e sidomos, ata që janë prag e mbi të dyzetat.
Disa herë të djelave zgjohem herët në mëngjes, shkruan ajo, vrapoj të ndez televizorin me shpresën që të shoh aventurat e ” Nils Holgersson”. Zgjohem duke imagjinuar aromën e kuleçëve që më bënte mami të dielave në mëngjes. I skuqte mirë e mirë nga të dyja anët dhe akoma të ngrohta m’i jepte mbi kapakun tipik të atyre kohërave, kapakun alumin i larë aq mirë me tel, saqë kur e kisha në duar pasqyrohej kulaçi, copa e vogël e djathit të bardhë dhe unë bashkë me Nilsin. Mbaj mend mangallin me prush që kishte salduar vet babi dhe që na e afronte tek këmbët që të rrinim ngrohtë.
Ato ishin të djelat më të bukura “ever”. Çdo vit Babagjyshit i kërkoj po të njëjtën dhuratë: të kthehem ndonjë herë e vogël dhe të jetë përsëri e dielë, që të mahnitesha përsëri me fluturimet e Nilsit dhe Martën. Të shihja nga lart Globin dhe problemet ,dhe të humbisja në ndodhitë e Çufos. Një e dielë si atëherë kur prisnim Vitin e Ri me padurim për të ngrënë fshehurazi arrat midis petëve të bakllavasë dhe s’na zinte gjumi deri sa me datën 1, plot gëzim, prisnim ardhjen e gjyshërve.
Pak kthim në fëmijëri, këtë i kërkoj, që të shihja Botën për një të dielë me sytë plot jetë e dashuri siç vetëm fëmijët dinë të bëjnë. Aaa….. do ishte me siguri një super dhuratë. Po ju? Çfarë i kërkuat Babagjyshit ju këtë vit?
