Një grup mjekësh kritikë në Hollandë, kanë ngritur një fondacion për të tërhequr vëmendjen për ato që ata i quajnë “masa të tepëruara ndaj koronës”. Ata janë të shqetësuar për pasojat afatgjata, përfshirë edhe shëndetin mendor të njerëzve, dhe besojnë se shëndeti mendor në këtë situatë, përbën më rrezik se korona. Sipas tyre, politika ndaj koronës duhet të përqendrohet më tepër tek parandalimi i përfundimit të njerëzve nëpër spitale.
Ky grup mjekësh përpiqet t’ju shpjegojë njerëzve si të jenë të shëndetshëm dhe çfarë të marrin për të mospërfunduar në spital: Ka gjithnjë e më shumë studime, që tregojnë për shembull për efektet pozitive të vitaminës D, zinkut, ivermektinës. Dikush mund të thotë që nuk ka ende prova përfundimtare shkencore. Po përse nuk përqendrohemi tek to, në mjekime kaq të lira, që të parandalohet përfundimi i njerëzve në spital? thotë internistja Peeters, bashkëthemeluese e fondacionit “Doctors Covid Collectief”.
Mjekët e këtij fondacioni besojnë se rreth koronës po mbillet një frikë e panevojshme, dhe ata duan t’u thonë njerëzve se 98% e atyre që preken nga covidi, nuk përfundojnë në spital, si dhe shkalla e vdekshmërisë nën 70 vjeç është tejet e ulët.
Megjithatë, shumë njerëz janë të shqetësuar, vazhdon Peeters në intervistën e saj dhënë në të përditshmet hollandeze. Dhe në zyrën e mjekut unë dëgjoj për divorcet nga korona, për vetëvrasjet. Për shkak të mbylljes, njerëzit janë të detyruar të rrinë brenda, duke zvogëluar kështu përmbajtjen e vitaminës D. Ata lëvizin më pak. Kujdesi parësor është nën presion. Çfarë do shohim, po të kthejmë kokën prapa pas pesë vitesh? Numri i jetëve të shëndetëshme humbur prej masave të koronës, nuk ka për të qenë më i lartë se ai i fituari prej masave shtrënguese të tij.
Verën e kaluar Peeters qe një nga nismëtaret e një letre publike, shkruar prej mjekëve mbi politikën që po ndiqej ndaj koronës. Ajo u nënshkrua prej mijëra syresh, duke frymëzuar edhe lëvizjen tejet të kritikuar që shpërtheu në Hollandë, ‘Lironi njerëzit’.
Peeters shpjegon se fonacioni është një iniciativë e mjekëve nga të tëra fushat e mjekësisë dhe një pjesë e tij janë tejet aktivë edhe në mjekësinë alternative, si fjala bie homeopatia. Ajo është e bindur se kriza e koronës duhet trajtuar në një perspektivë më të gjerë. Kemi të bëjmë me një krize sistemike, thotë ajo. Dhe kjo nuk mund të zgjidhet duketparë vetëm situatën nëpër spitale.
