Kreu i qeverisë Edi Rama ka komentuar ditën e sotme vendimin e Gjykatës Kushtetuese për shkarkimin anti-ligjor të Veliajt prej postit të kryetarit të Bashkisë.
Mes të tjerave, Rama thekson se me këtë vendim u vërtetua që ai nuk i ka kapur të gjitha pushtetet, dhe tashmë po pret që Kushtetuesja ta kthejë Veliajn në detyrë.
Shënimi i plotë i Ramës
Disa rrjedhime logjike nga vendimi i Gjykatës Kushtetuese:
- Ja që edhe njëherë u provua se nuk i paskam kapur unë të tëra pushtetet dhe kjo është një gjë sa e qartë, aq edhe e mirë apo jo
- Nëse Tirana nuk do të ketë zgjedhje deri në 2027-ën dhe Kushtetuesja mendon se kryebashkiaku i burgosur i Tiranës nuk mund të largohet përveçse me zgjedhje, atëherë disproporcioni i mbajtjes së tij në qeli, nuk është më thjesht në dëm të lirive e të drejtave kushtetuese të personit, po edhe në dëm së drejtës kushtetuese të popullit të kryeqytetit për t’u shërbyer nga i zgjedhuri i vet apo jo
- Çdo njeri normal që nuk sheh tek qëndrimi i Kushtetueses një qëndrim të verbër kundër qeverisë në dëm të madh të Tiranës, po një qëndrim të vendosur parimor, nuk ka se si të mos presë që me të njëjtën parimësi, kur të gjykojë paraburgimin e tij, Kushtetuesja ta kthejë Erion Veliajn në detyrë, për të vijuar procesin gjyqësor në gjendje të lirë apo jo
Pika 1 dhe 2 janë të sigurta, pika 3 mbetet për t’u parë, ndërkohë le të urojmë që kushdo ka në dorë ta ndihmojë zgjidhjen e këtij ngërçi absurd, të kujtohet se kryeqyteti nuk mund të trajtohet si jetim, për vite me radhë.
