Qeveria ka vendosur shkarkimin e Ceno Klosit nga posti i zv.ministrit të Infrastrukturës.
Vendimi është marrë gjatë mbledhjes që u zhvillua sot. Gjatë mbledhjes që u zhvillua mësohet se janë shkarkuar nga detyra gjithashtu zv.ministrja e Turizmit dhe Mjedisit, Ilva Gjuzi dhe zv.ministrja e Brendshme, Romina Kuko.
Kujtojmë se Ceno Klosi, i cili fitoi mandatin e deputetit në zgjedhjet e 11 Majit, është në hetim për katër vepra penale nga SPAK lidhur me akuzat që rëndojnë ndaj tij në periudhën kur ka qenë drejtues i Tatimeve.
Ceno Klosi ka qenë një prej zyrtarëve besnik të ministres së Infrastrukturës, Belinda Balluku. Ai ka shërbyer në disa funksione, duke lënë pas dëme të konsiderueshme financiare.
Qe nga muaji mars i vitit 2024, Ceno Klosi po hetohet nga SPAK për veprat penale të “korrupsionit”, “shpërdorimit të detyrës”, “mashtrimit” dhe “falsifikimit të dokumentave”.
Prokuroria e Posaçme ka konfirmuar se hetimet ndaj kryetatimorit Klosi u regjistruan mbi bazën e dy kallëzimeve të bëra nga Partia Demokratike.
“Mbi bazën e kallëzimit penal të dërguar nga grupi parlamentar i subjektit politik Partia Demokratike, Prokuroria e Posaçme Kundër Korrupsionit dhe Krimit të Organizuar ka regjistruar Procedimin Penal Nr.259/2023 datë 13.12.2023, për veprat penale “Korrupsioni pasiv i personave që ushtrojnë funksione publike ”, “Shpërdorimi i detyrës”, “Falsifikim i dokumentave” dhe “Mashtrimi””, njoftoi prokuroria.
Klosi, i cili në krye të tatimeve, iu është bindur me shumë urdhrave politikë, sesa ligjit, duke ndëshkuar padrejtësisht bizneset, ka punuar për 13 vite si specialist dhe drejtues sektorësh në banka të nivelit të dytë dhe më pas gjatë periudhës 2015-2021 ka mbajtur pozicionin si Drejtor i Departamentit Ekonomik në OSHEE.
Në qershor të 2021 u emërua Drejtor i Përgjithshëm i Agjencisë Kombëtare Ujësjellës- Kanalizime dhe Mbetjeve të ngurta, ndërsa me VKM 625, datë 22/10/2021 u emëruar drejtor i Përgjithshëm i Tatimeve.
