Një përplasje e fortë ka ndodhur mes punonjësve të FBI dhe Elon Musk, kreut të DOGE, i cili u ka vënë ultimatum 48 orë punonjësve federalë në fundjavë, për të shpjeguar dhe justifikuar punën e tyre. Kushdo që nuk e bën këtë deri të hënën rrezikon të humbasë punën, shkruhej në imeljin e dërguar prej Musk.
Ultimatumi i miliarderit iu dërgua 2.3 milionë punonjësve publikë, duke shkaktuar panik në agjencitë qeveritare.
Shumë punonjës iu drejtuan avokatëve për të kuptuar se si duhet të përgjigjen.
Ndërkaq, FBI-ja e besnikut të Trump, Kash Patel, e ka udhëzuar stafin e saj të mos e ndjekë urdhrin e Muskut: “Shqyrtimet do të kryhen në përputhje me autorizimet e agjencisë”, u shpreh Patel.
Departamenti i Shtetit ka njoftuar se do të përgjigjet për punonjësit e tij: “Askush nuk është i detyruar të raportojë aktivitetet e tij jashtë zinxhirit komandues të ministrisë”, deklaroi departamenti i Marco Rubios.
