“Kjo ishte një javë historike për Shtetet e Bashkuara. Epoka e artë ka filluar”, tha Donald Trump përmes video-lidhjes në Forumin Ekonomik Botëror në Davos, në atë që ishte paraqitja e tij e parë si president në një skenë ndërkombëtare.
Trump u përshëndet me duartrokitje nga të pranishmit. “Shtetet e Bashkuara”, deklaroi ai, “do të jenë së shpejti më të forta, më të pasura dhe më të bashkuara dhe planeti do të jetë më paqësor dhe i begatë, falë asaj që po bëjmë dhe asaj që do të bëjmë”, thaTrump. “Administrata ime ka filluar një revolucion të arsyeshëm,” deklaroi ai.
“Kërcënimi” për kompanitë: “Prodhoni në SHBA ose do të ketë taksa”
“Mesazhi im për të gjitha kompanitë në botë është shumë i thjeshtë, ejani prodhoni produktin tuaj në Amerikë dhe ne do t’ju japim ndër taksat më të ulëta të çdo kombi”, deklaroi Trump në Forumin Ekonomik Botëror në Davos. “Nëse nuk doni ta prodhoni produktin tuaj në Amerikë, kjo është e drejta juaj. Por, shumë thjesht, do t’ju duhet të paguani shuma tarifash të ndryshme, të cilat do të orientojnë qindra miliarda dollarë, madje edhe triliona dollarë, në thesarin tonë, për të forcuar ekonominë tonë”, tha ai.
Trump përsëriti synimin e tij për të ulur normën e tatimit mbi të ardhurat e korporatave, duke e çuar atë “në 15% nëse prodhoni në Amerikë”. Presidenti më pas kritikoi CEO të Bankës së Amerikës, Brian Moynihan. “Duhet të hapni bankën tuaj për konservatorët, ju dhe të tjerët, sepse ajo që po bëni është e gabuar.” Qortimi erdhi pasi Trump iu përgjigj një pyetjeje nga Moynihan, duke përsëritur angazhimin e tij për uljen e inflacionit dhe krijimin e vendeve të punës.
Kongresi do të miratojë shkurtime masive të taksave
Shumica republikane në Kongres “do të miratojë shkurtimet më të mëdha të taksave në historinë amerikane, duke përfshirë shkurtimet masive të taksave për punëtorët dhe familjet”, tha Trump, duke shtuar synimin e tij për të ndërhyrë (pa e shpjeguar si) edhe në koston e parave. “Unë do të kërkoj që normat e interesit të bien. Ato duhet të bien në të gjithë botën.” Dhe, në lidhje me inflacionin, presidenti amerikan nuk ndenji pa e sulmuar paraardhësin e tij. Sipas Trumpit, Joe Biden kishte “humbur plotësisht kontrollin e situatës” në vend. “Ata shkaktuan krizën më të keqe të inflacionit në historinë moderne, duke rezultuar norma interesi rekord për ne dhe pjesën tjetër të botës,” tha ai.
Ulja e kostos së naftës, lufta në Ukrainë do të përfundojë menjëherë
“Do t’i kërkoj OPEC-ut dhe Riadit të ulin çmimet e naftës”, tha Trumpi, që e shpalli këtë si strategji për të ndërhyrë në konfliktin ukrainas. “Nëse nafta do të ishte më e lirë, lufta midis Rusisë dhe Ukrainës do të përfundonte menjëherë”, tha Trump bindshëm. “Përpjekjet për të arritur një marrëveshje, shpresojmë se kanë filluar, dhe është e rëndësishme të gjendet një zgjidhje”, vazhdoi Trump, duke e përshkruar teatrin e luftës si “një thertore”, e ku “asgjë e ngjashme nuk është parë që nga fundi i Luftës së Dytë botërore”. Presidenti njoftoi gjithashtu se “Arabia Saudite do të investojë të paktën 600 miliardë dollarë në Amerikë. Por unë do t’i kërkoj princit të Kurorës, i cili është një djalë i mrekullueshëm, ta rrumbullakosë atë në rreth një trilion. Unë mendoj se ata do ta bëjnë.
Do të doja të takoja Putinin së shpejti”
“Unë me të vërtetë do të doja të takoja Putinin së shpejti, për t’i dhënë fund kësaj lufte. Dhe jo nga pikëpamja ekonomike apo ndonjë gjë tjetër, por nga pikëpamja e miliona jetëve që po shpërdorohen”, deklaroi presidenti i Shteteve të Bashkuara. “Ukraina është e gatshme të bëjë një marrëveshje”, shtoi Trump. “Shumë më shumë njerëz kanë vdekur në Ukrainë nga sa është thënë”.
“Vendet e NATO-s të rrisin shpenzimet ushtarake në 5% të PBB-së”
“Unë gjithashtu do t’u kërkoj të gjitha vendeve të NATO-s, të rrisin shpenzimet e mbrojtjes në 5% të PBB-së, e cila është ajo që duhej të ishte vite më parë.” Trump ka rikthyer një nga kuajt e tij të vjetër të betejës, atë të pjesëmarrjes ekonomike të anëtarëve të Aleancës Atlantike. Shpenzimet ushtarake, sipas Trump, “ishin vetëm në 2% dhe shumica e kombeve nuk paguanin derisa unë arrita atje”.
Amerika kryeqyteti botëror i kriptomonedhave dhe AI
Duke lartësuar politikën energjetike që do t’i rikthehet përdorimit të naftës, presidenti amerikan Donald Trump në Davos, në forumin ekonomik botëror, tha se kjo politikë energjetike “do t’i bëjë Shtetet e Bashkuara një superfuqi prodhuese dhe kryeqytetin botëror të inteligjencës artificiale dhe kriptomonedhave”. Ai shtoi se “marrëveshja e gjelbër është një mashtrim i madh” E njëjta linjë e ashpër, edhe për klimën: “Industria e gjelbër është një mashtrim. Ne do t’i lejojmë njerëzit të blejnë makinat që duan.” “Qymyri është një burim i mirë rezervë. Kushton pak dhe ne në Shtetet e Bashkuara kemi shumë prej tij, ashtu siç kemi shumë gaz dhe naftë”, tha përsëri presidenti amerikan. Marrëveshja e Re e Gjelbër ishte “një turp”, komentoi Trump. “I dhashë fund Marrëveshjes së Re të Gjelbër qesharake dhe tepër shpërdoruese. Unë e quaj mashtrim të gjelbër,” tha Trump në Davos, duke sulmuar Joe Biden.
Presidenti shpjegoi se administrata e tij po lëviz me shpejtësi të paprecedentë për të zgjidhur “fatkeqësitë” e trashëguara nga një “grup njerëzish krejtësisht të paaftë”. “Bideni”, shtoi ai, ka “shpërdorur 8 trilion dollarë” në shpenzime, kufizime energjitike, rregullore dhe taksa të fshehura që kanë rezultuar në “krizën më të keqe të inflacionit në historinë tonë”.
BE e trajton Amerikën në mënyrë të padrejtë: taksa të konsiderueshme dhe TVSH
“Nga këndvështrimi i Amerikës, BE-ja na trajton padrejtësisht shumë keq”, tha Donald Trump, duke shpjeguar se kjo lidhet me taksat dhe TVSH-në “në shuma të konsiderueshme”. “Ata nuk i marrin produktet tona bujqësore, nuk i marrin makinat tona. Megjithatë, ata na dërgojnë me miliona makina dhe vendosin taksa për gjërat që duam të bëjmë,” vazhdoi Trumpi, duke rrëfyer problematikat në këtë drejtim.
Presidenti shtoi se sistemi evropian i taksave dhe taksave, “e bën shumë të vështirë sjelljen e produkteve në Evropë, edhe pse ata presin t’i shesin produktet e tyre në SHBA. Siç e dini, qindra miliarda dollarë deficit me BE-në, dhe askush nuk është i lumtur për këtë. Ne do të bëjmë diçka për këtë.”
Marrëdhënia me Kinën është e pabalancuar
Trump përsëriti se “marrëdhëniet tregtare me Kinën tani janë të çekuilibruara dhe ne duhet ta korrigjojmë këtë. Kemi një defiçit të madh”.
Duke folur në Forumin e Davosit, presidenti amerikan tha se kishte “një marrëdhënie të shkëlqyer me Xi”. “Unë mendoj se ne do të kemi një marrëdhënie të shkëlqyer. Gjithçka që duam është drejtësia. Ne duam vetëm një fushë loje të barabartë. Ne nuk duam të përfitojmë,” tha Trump, pas një pyetje në lidhje me marrëdhëniet SHBA-Kinë. “Më pëlqen shumë presidenti Xi. Më ka pëlqyer gjithmonë. Ne kemi pasur gjithmonë një marrëdhënie të shkëlqyer,” vazhdoi Trump, duke thënë se Covid ka shkaktuar tendosje në marrëdhëniet midis dy vendeve. “Ne shpresojmë se Kina mund të na ndihmojë të ndalojmë luftën, veçanërisht me Rusinë, Ukrainën dhe ata kanë fuqi të madhe mbi atë situatë. Ne do të punojmë me ta”, tha presidenti amerikan.
