Presidenti i sapoemëruar Donald Trump ka bërë me dije se nëse Putin nuk nënshkruan një marrëveshje të menjëherëshme për ndalimin e luftës, atij nuk do t’i mbetet gjë tjetër vecëse të shtojë taksat dhe sanksionet ndaj saj.
“Pa një marrëveshje”, shkroi Trump në Truth “Nuk kam zgjidhje tjetër veçse të rris, taksat, tarifat dhe sanksionet për çdo gjë që u shet Rusia Shteteve të Bashkuara dhe vendeve të tjera pjesëmarrëse. Ta mbarojmë këtë luftë, e cila nuk do të kishte filluar kurrë nëse do të isha President! Ne mund ta bëjmë atë në mënyrën e lehtë, ose në mënyrën e vështirë – dhe mënyra e lehtë është gjithmonë më e mirë”, u shpreh ai.
I pyetur për luftën në Ukrainë menjëherë pas inaugurimit të tij të hënën, Trump tha se homologu i tij rus po shkatërronte Rusinë duke refuzuar negocimin e një armëpushimi.
“Rusia është më e madhe, ata kanë më shumë ushtarë për të humbur, por kjo nuk është mënyra për të drejtuar një vend”, u shpreh Trump.
Ndërkohë që Zelensky në një intervistë për Bloombergun nga Davos, shpjegoi se aleatët evropianë nuk kanë mjaftueshëm ushtarë për të përfaqësuar një pengesë realiste për Vladimir Putin, ndaj forcat paqeruajtëse duhet të përfshijnë edhe SHBA-në.
“Çdo forcë paqeruajtëse në Ukrainë duhet të përfshijë edhe Shtetet e Bashkuara,” theksoi Presidenti ukrainas Volodymyr Zelensky në fjalën e tij.
