nga Taulant Kopliku, gazetar
Beqari milioner i Alketës po thyen çdo parashikim. Tema thuajse e njëjtë. Të rinj e të reja me një formim skandaloz, që kthehen në modele “të parezistueshme” për masën. Personazhe të pilotuar në çdo detaj. Të instruktuar se kur duhet të ngrenë zërin, kur duhet të qeshin, kur duhet të qajne, të braktisin studion, të preken, të puthen, të shtyhen. Një turmë robotësh të kurdisur pa pikën e formimit dhe personalitetit, që fatkeqesisht kanë kurdisur një milet të tërë folklorik.
Kontrast fatal! Nga njëra anë super luksi që na sjell një “realitet” fals të rinisë shqiptare, e nga ana tjetër mijërat e të rinjve të papunë, të pa shpresë, të pa nginjur në darkë, që ngulen në tv për të “shijuar” sadopak vanitetin që servirin gjigantet mediatike.
Pastaj janë ata. Ata që lëvizin fijet e këtyre maskaradave. Ata që mendojnë vetëm sesi audienca të përfundojë në gropën që ata hapin. Një popull i vjedhur dhe i rrahur, ka nevojë që t’i hiqet mendja nga revolta që i mbush shpirtin prej vitesh. E kush më mirë se “Alketat” e televizioneve mund ta bëjnë këtë?
Ndërkohë, pak më lart, kodrave rreth Tiranës, vipat e këtij vendi, të izoluar në oazet e tyre rrëzëllitëse larg realitetit të kafshatës, as që denjojnë të bëjnë dy rreshta kritike, për skenat e luksit të shfrenuar që i bëjnë karshillëk një populli me pjatën bosh përpara.
