Teksa motorrët për fushatën e zgjedhjeve vendore duket se janë ndezur fort nga të dyja kahet politike, pozitë-opozitë, duket se një konflikt ka lindur mes një prej televizioneve më të mëdha kombëtare në vend, Top Channel-it, dhe kreut të qeverisë, Edi Ramës.
Një propozim me sa duket për ndonjë projekt emisioni televiz financuar me paratë e shtetit, qenka bërë molla e sherrit mes tyre, e pikërisht për këtë motiv, kjo media, sipas kreut teë qeverisë, nuk po i thotë më publikut të vërtetën, por po fabrikon gjysmë të vërteta dhe gjysmë të rrema.
Në disa postime në tuiterin e tij, publikuar disa ditë më parë, kreu i qeverisë ka publikuar pa ndalur disa prej fabrikimeve të kësaj medieje, siç i cilëson ai, në favor të argumentimit pse kjo media i është kthyer kundër.
“Ja opinioni i pamaskuar i medias në fjalë për zhvillimin e fermave me mbështetje nga AZHBR, në letër kërkesën për 120 milion lekë që ta ndajë këtë të vërtetë me publikun“, shkruan Rama në twitterin e tij në fund, duke përmbyllur kështu edhe akuzën e plotë ndaj televizionit Top Channel.
Sa më poshtë disa prej teksteve të Ramës që akuzojnë Top Channel për fabrikim t; fakteve, ngase AZHBR-ja nuk po ia akordon shumën e kërkuar prej tij për realizimin e projektit në fjalë:
Ja edhe maska e medias në fjalë pasi nuk merr lekët e kërkuara me hir, në përpjekjen për t’i marrë me pahir duke helmuar opinionin publik me kronika të mbushura me gjysëm të vërteta (të cilat janë edhe rrenat më të mëdha), e të ambalazhuara me tituj bombastikë të gënjeshtërt…
Ja për shembull se si funksionon shantazhi mediatik.Kërkohen 120mln lek nga AZHBR për t’u treguar shqiparëve kudo ndodhen sa mirë po ecën Shqipëria rurale. AZHBR s’e plotëson dot kërkesën e shpjeguar në shumë faqe se si e qysh tërë dynjaja do shohë shqip/anglisht suksesin e saj!
Atëherë pllaka kthehet përmbys dhe dynjasë i jepet një emision i tërë me gllabërim parash të bujqësisë, një fabrikim nga fillimi në fund me gjysëm të vërteta që janë edhe gënjeshtrat më të mëdha, e ngjashme si dy pika uji me një fabrikim nga i njëjti kanal për Rilindjen Urbane…
Gënjeshtra më e madhe është gjysëm e vërteta! Familja trajtohet me bonus qeraje! S’ka pranuar te levizi, bashkia i ka çuar kontenier. S’ka pranuar as të marrë grantin ta ndërtojë vetë shtëpinë që tani po ia bën bashkia. Po këto publiku s’duhet t’i dijë se duhet rrëzuar qeveria!
