Teksa ditën e sotme, Partia Demokratike mbush plot 31 vite nga themelimi i saj, duket se ky përvjetor nuk e gjen partinë më të madhe opozitare në kushtet më të mira. Pikërisht ditën e sotme, lideri historik i saj Sali Berisha, ka mbledhur Kuvendin e Jashtëzakonshëm të PD-së, për të shkarkuar liderin aktual të saj, Lulëzim Bashën, të cilin e emëroi vetë 8 vite të shkuara.
E ndërkohë që 4932 demokratë janë mbledhur për ta shkarkuar, kreu aktual i PD-së Lulëzim Basha, ka mbledhur pjesën e mbetur të demokratëve, për të përkujtuar 31 vjetorin e PD-së.
Mblidhemi në një ditëkuptimplotë për çdo demokratë e çdo demkrate, ka nisur fjalën e vet Basha përpara selisë së PD-së, ditë kuptimplote për të gjithë shqiptarët që kanë në zemër vlerat e lirisë, demokracisë dhe me këto vlera janë nisur plot 31 vjet më parë, në një rrugëtim nga më të bukurit… Së pari dhe ndryshe nga herët e tjera, Partia Demokratike e kujton këtë ditë, duke përjetësuar në ambientin e saj, dokumentin themeltar të firmëtarëve të Partisë Demokratike, të emrave të atyre që sot nuk janë mes nesh, por janë të paharruar në kujtimin e zemrave të demokratëve, të atyre qe janë kthyer për të festuar me ne nga Shtetet e Bashkuara të Amerikës, nga Kanadaja Britania dhe Greqia, nga Gjermania e kudo tjetër.
Sot, ne jemi këtu, dhe unë jam këtu, tha mes të tjerave Basha, për të konfirmuar në emrin tuaj dhe të mijëra demokratëve anë e mbanë Shqipërisë, se e shkuara nuk mund dhe nuk do të na pengojë në misionin tonë, për të ardhmen e Shqipërisë, se duke nisur që nga ky moment e deri në realizimin e objektivit tonë parësor, për t’i çelur rrugën europiane Shqipërisë, që është largimi i regjimit antiperëndimor, antidemokratik, antidrejtësi, të Edi Rames, ne të gjithë bashkë do të vazhdojmë përpara dhe vetëm përpara, tha mes të tjerave Basha.
