Kreu i Partisë Demokratike Lulëzim Basha, i ka shprehur ngushëllimet e tij familjes së të ndjerit A. Haxhiaj , që humbi jetën në lagjen “Asim Zeneli” Gjirokastër për shkak të zjarrit që i përpinë baçen.
Në statusin e tij, Basha i konsideron emergjencat civile krejt të paërpgatitura për situatën, njësoj si në rastin e tërmetit, e po ashtu fton të gjithë qytetarët që ndodhen në zonat e rrezikuara, t’i braktisin ato e të kujdesen për jetën.
I shpreh ngushëllimet familjes së Andrea Haxhiaj, shkruan Basha, që humbi jetën sot si pasojë e zjarrit në zonën e Gjirokastrës. Masat gjysmake te qeverisë nuk e kanë normalizuar dot situatën alarmante të shkaktuar nga zjarret e ditëve te fundit në vend. Pavarësisht paralajmërimeve të qytetarëve dhe medias, në shumë zona zjarret vijojnë prej ditësh, ndërsa angazhimi i vetëm i qeverisë ka qenë përpjekje me mjete rrethanore të papërshtatshme dhe servirja e videove te zyrës së propagandës. Si në rastin e tërmetit, emergjencat civile dhe qeveria ndodhen totalisht të papërgatitura për t’u ardhur në ndihmë qytetarëve dhe për të shmangur pasojat e katastrofave natyrore. Përgjegjësi i kësaj situate vijon turet e inagurimeve false duke lënë në mëshirë të fatit banorët dhe qindra hektarë që po digjen prej ditësh. Është momenti që çdokush që ndodhet në zonat e rrezikuara nga zjarri të largohet dhe të kujdeset për jetën. Forcat e emergjencës që ndodhen në terren të marrin masa urgjente që brenda mundësive të sigurojnë jetën e banorëve të rrezikuar dhe të shmangin përhapjen e mëtejshme të zjarreve.
