Presidenti turk Erdogan dhe ai francez Emmanuel Macron, kanë komunikuar ditën e djeshme përmes një telefonate, mbi situatën në Ukrainë dhe pushtimin e saj prej Rusisë. Lajmin e bëjnë të ditur mediat turke, të cilat përcjellin njoftimin zyrtar lëshuar nga zyrat e komunikimit pranë Erdoganit.
Si Turqia, ashtu dhe Franca, thuhet në lajmin e përcjellë, kanë dënuar vendimin e Moskës për të sulmuar Ukrahinën, përmes tokës, detit, dhe ajrit, në luftën më të madhe të një shteti kundër një tjetër në Evropë, që prej Luftës së Dytë Botërore.
Në fillim të ditës së djeshme, Erdogan pohoi se sulmi ishte “kundër të Drejtës Ndërkombëtare dhe një goditje e rëndë ndaj paqes, qetësisë dhe stabilitetit në rajon”, duke pohuar se “Turqia mbështet integritetin territorial të Ukrainës, dhe është sinqerisht e trishtuar për pushtimin rus”.
Sipas mediave turke, Erdogan ka ndërtuar ndërkohë marrëdhënie të mira me të dy liderat, atë të Rusisë dhe atë të Ukrainës, dhe qe ofruar më parë të bëhej edhe ndërmjetëse mes të dyve, për të sheshuar konfliktin.
Ndërkaq, ministri turk i Punëve të Jashtme, ka deklaruar se “ky sulm përbën një dhunim të rëndë të së drejtës ndërkombëtare dhe përfaqëson një rrezik serioz për rajonin tonë dhe botë. I kërkojmë Federatës Ruse, t’i japë fund menjëherë këtij akti të padrejtë dhe joligjor’.
