Shqipëria nis sot vaksinimin anti-covid. Në fjalën e mbajtur me këtë rast në stadiumin Air-Albania, Rama theksoi se kjo parti e parë e vaksinave, vinte në Shqipëri si pasojë e marrëdhënieve të mira bilaterale, krijuar prej qeverisë së tij, me vende të ndryshme të BE.
Dua të nënvizoj, tha ai, që ndihem vërtet i lehtësuar për faktin se jo vetëm kemi arritur në kushte aspak të lehta të sigurojmë 500.000 dozat e para të Pfizer-it, por të sigurojmë edhe fillimin e vaksinimit para afatit, falë marrëdhënieve bilaterale, që sikundër, edhe e kam bërë me dije publikisht, janë kyçe në këtë proces të çuditshëm, ku faktikisht, strategjia dhe drejtimi i përcaktuar nga BE, për t’u investuar në skemën e Covax-it, ka rezultuar të jetë edhe sot që flasim, një drejtim i papërcaktuar në kohë. Pra, pavarësisht angazhimit me Covax, të Shqipërisë dhe shumë vendeve të tjera jashtë BE, nëse do qëndronim në pritje të tij, do ishim ende duke pritur dhe nuk dihet ende sot, se sa do zgjaste kjo pritje. Për këtë arsye, ne u angzhuam me kanale të tjera. Ia kemi dalë të kontaktojmë drejtëpërdrejtë me Pfizerin në Nju Jork, dhe të hapim me ta një kanal negociatash të vështira, për hir të pamundësive objektive. Njëkohësisht, kemi hapur edhe 4 kanale bilaterale me 4 vende të tjera, dhe vaksinimi që fillojmë sot, është rezultati i parë me një prej kanaleve bilaterale me një vend të BE, të cilin s’jam i autorizuar ta bëj publik, për shkak se e kanë kërkuar vetë. Meqë thonë se është Greqia, mund t’ju them që nuk është Greqia.
E kemi të siguruar vaksinën me doza muaj pas muaji, duke nisur që javën e 3 të janarit, por qëllimi ynë është të rrisim ndërkohë kapacitetin vaksinues, duke rritur prurjet e vaksinës Pfizer, e duke i hapur rrugën edhe asaj të Astra-Zeneca-s. Dua t’ju shpjegoj që ky është një proces që s’e bëjmë vetëm ne, por e bëjnë të gjitha vendet. Po të shihni si BE-ja e ka konceptuar këtë proces, në momentin kur ka menduar të mendojë vetëm për veten e vet, është lënë në diskrecionin e vendeve anëtare, që të ndërtojnë në rrugë bilaterale me vendet jo anëtare, procese ndërveprimi për vaksinën, të cilat janë të llojeve të ndryshme. Ka procese ku një vend iks është i gatshëm të japë një pjesë të dozave në dispozicion, për shkak se nuk i përdor dot të të gjitha menjëherë, dhe ato t’i shesë.
Për fat të mirë në të gjitha kanlaet ku tregtohet Pfizer-i, nuk ka negociata mbi çmimin. Çmimi është fiks. Ka kanale ku veprohet me këmbim. Pra ka vende që duan më shumë doza në për kohë dhe një vend tjetër i siguron mundësinë që këto doza t’i garantojë me shkëmbim, pra vendi i parë që i merr, i kthen në një kohë të dytë… Pra është diçka që funksionon si një lloj burse, ku e vetmi që nuk ndryshon është çmimi.
E tëra kjo, ka vazhduar Rama në fjalën e tij, është për meritë të diplomacisë sonë dhe e respektit qe vendet e tjera kanë krijuar për ne këto vite. Është fakt që në një garë lypsash për vendin e tyre, unë jam pretendent për vendin e parë, ka përfunduar ai.
