Ka ngjallur reagime të forta raporti i Oxfam-it për 2025-n, sipas së cilit, teksa bota gjendet mes luftrave e varfërisë, pasuria e super të pasurëve është rritur me 16%. Sipas këtij raporti të publikuar në faqen zyrtare të Oxfam-it, miliarderët e botës në fund të 2025 janë 3000, me një pasuri neto totale prej 18.3 trilionë dollarësh, një përqendrim ky i paparë pasurie përgjatë historisë.
Sipas raportit të Oxfam-it, ndërsa pasuria e miliarderëve globalë u rrit me 2.5 trilionë dollarë në vitin 2025 – një shumë thuajse e barabartë me pasurinë totale që gëzon gjysma më e varfër e njerëzimit, ose 4.1 miliardë njerëz – shkalla e reduktimit të varfërisë globale ka mbetur e pandryshuar gjatë gjashtë viteve të fundit, dhe varfëria ekstreme po rritet përsëri në Afrikë. Dhe pasuria e kombinuar e miliarderëve dhe gjysmës më të varfër të botës, shpjegon raporti i Oxfam, do të ishte e mjaftueshme për të zhdukur varfërinë ekstreme 26 herë më shumë.
Pasuria e miliarderëve është rritur me 81% krahasuar me vitin 2020
Sipas Oxfam-it, pasuria e super të pasurve u rrit me 16% në terma realë në vitin 2025, tre herë më shpejt se mesatarja e pesë viteve të fundit, duke arritur një rekord prej 18.3 trilionë dollarësh, një rritje prej 81% krahasuar me vitin 2020. Vetëm 12 miliarderët më të pasur në botë, zotërojnë më shumë pasuri (2.635 trilionë dollarë) sesa 4.1 miliardë njerëz që përbëjnë gjysmën më të varfër të njerëzimit. Ky përqendrim i pasurisë është i pashembullt në histori, ndërkohë që një në katër persona në botë vuan nga pasiguria ushqimore dhe gati gjysma e popullsisë së botës jeton në varfëri.
Transformimi i pasurisë në pushtet politik
Por pasuri do të thotë edhe pushtet. Analiza “Në Humnerën e Pabarazisë: Si t’i Shpëtojmë dhe të Kujdesemi për Demokracinë” e Oxfam-it, ilustron se si “super të pasurit jo vetëm që kanë grumbulluar më shumë pasuri nga sa mund të shpenzojnë ndonjëherë, por e kanë transformuar atë në pushtet politik, të përdorur për të formësuar shoqëritë tona dhe për të ndikuar në rregullat ekonomike globale, në dëm të të drejtave dhe lirive individuale dhe kolektive në mbarë botën”. Oxfam-i vlerëson se sot një miliarder ka 4,000 herë më shumë gjasa të mbajë poste politike, sesa një qytetar i zakonshëm.
Sot, vetëm 3 në 10 njerëz jetojnë në demokraci
Pabarazia ekonomike, theksohet më tej në raportin e Oxfam-it, luan një rol kyç në gërryerjen e të drejtave, lirisë politike e lirisë së shprehjes, duke krijuar terren pjellor për autoritarizëm. “Rreziku i kthimit prapa të demokracisë, është shtatë herë më i mundshëm në vendet ku nivelet e pabarazisë janë më të larta. Përqindja e popullsisë së botës që jeton në autokraci, është rritur me gati 50%. Midis viteve 2004 dhe 2024, vetëm 3 në 10 njerëz jetojnë në demokraci, krahasuar me 1 në 2 në vitin 2004”, shpjegon Oxfam-i. Sipas organizatës, “7 deri 10 korporatat më të mëdha globale të medias, janë në pronësi të miliarderëve, duke u lejuar disa lojtarëve të ushtrojnë ndikim disproporcional në diskursin publik”.
“Administrata Trump favorizon një elitë oligarkike”
Së fundmi, Oxfam vëren se “rritja e pasurisë së miliarderëve, përkon me zbatimin e axhendës së administratës Trump, për të favorizuar një elitë oligarkike, si në Shtetet e Bashkuara ashtu edhe në nivel global. Qeveria amerikane jo vetëm që ka ulur taksat për ultra të pasurit, por ka minuar përpjekjet ndërkombëtare për të taksuar shumëkombëshet e mëdha dhe ka penguar çdo përpjekje për të kufizuar fuqinë e tyre monopoliste”.
