Në konferencën e dhënë përpara gazetarëve mbi progres-raportin e KE-së sa u takon plotësimit të kushteve prej shqiptarëve, Ambasadori i Bashkimit Evropian në Shqipëri Luigi Soreca u shpreh se Shqipëria i ka plotësuar të gjitha kushtet e vendosura nga BE, e se Konferenca Ndërqeveritare për anëtarësimin e saj, duhej të mblidhej me patjetër brenda vitit.
Në përgjithësi vlerësimi është që Shqipëria ka vijuar me përparimet për reformat që kanë të bëjnë me BE-në dhe rezultatet janë të prekshme, u shpreh Soreca në fjalën e tij. Raporti përcakton që Shqipëria i ka përmbushur kushtet e caktuara nga Këshilli dhe ne theksojmë edhe një herë, që Konferenca e parë Ndërqeveritare, duhet të mblidhet sa më shpejt që të jetë e mundur, deri para fundit të vitit. Po bëhet një punë intensive nga të gjithë drejtuesit evropianë, për të punuar me shtetet anëtare, për të tejkaluar ato çështje dy-palëshe, në mënyrë që kjo gjë të ndodhë, sepse shtyrjet ose vonesat në lanëimin e nisjes së negociatave për anëtarësim, do të kenë një ndikim negativ për besueshmërinë e BE-së. Në fushën e sundimit të ligjit, raporti tregon se rezultatet konkrete kanë vijuar me përparësi në reformën në drejtësi dhe për procesin e vetingut. Shqipëria po ashtu ka bërë përparim në luftën kundër korrupsionit dhe krimit të organizuar, duke krijuar ato trupa të reja të specializuara për zbatimin e ligjit, dhe duke marrë pjesë në formë aktive, në një sërë operacionesh ndërkombëtare të sundimit të ligjit, gjë që ka çuar në disa arreste. Por puna për reformat në sundimin e ligjit duhet të vijojë. Në veçanti ne presim që të ketë ecuri me një bilanc ose historik të sundimit të ligjit. Në raport thuhet gjithashtu qartë, se Shqipëria është 100% në përputhje me politikën e BE-së, për çështjet e Jashtme dhe të Sigurisë.
Soreca vijoi më tej duke e vendosur theksin tek liria e mediave, e cila në raport cilësohet si një prej fushave ende problematike: Pikërisht kjo atmosferë e sulmeve verbale dhe fushata baltosjeje, veprimet e frikësimit të gazetarëve, nuk duhet të vijojnë. Duhet bërë më shumë për të vijuar dhe pasur pavarësinë e rregullatorit të medias, si dhe fuqizimin e pavarësisë dhe standardeve profesionale, e po ashtu edhe aspektin financiar të transmetuesit publik. Vetërregullimi i mediave onlajn duhet të sigurohet, dhe Parlamenti dhe qeveria që ka rrjedhur nga zgjedhjet e 25 prillit, duhet të angazhohen për të siguruar ndryshime të mundshme për ligjin e Medias, të cilat duhet të jenë në përputhje me opinionin e Komisionit të Venecias. Një fushë tjetër që është shumë e rëndësishme, dhe ne do ta ndjekim edhe këtë çështje, është ajo që ka të bëjë me pakicat. Duhet të miratohen nënligje që kanë të bëjnë me këtë fushë, e po ashtu procesi i regjistrimit të pronave, shpronësimi, ose kompensimi, duhet të avancojë. Sa u përket kritereve ekonomike, në raport thuhet se si qeveria, ashtu edhe Banka Qendrore e Shqipërisë, kanë marrë veprime të shpejta dhe të duhura për të mbështetur biznesin, familjet, por edhe sektorin e shëndetësisë, pas krizës së covidit, pra për të ulur ndikimin që kishte ajo në tregun e punës dhe për të ruajtur stabilitetin makro-ekonomik dhe stabilitetin financiar. Komisioni është i mendimit që ka ardhur koha tashmë për të pasur konferencën ndërqeveritare dhe përpara fundit të vitit. Por teksa ne presim që kjo të ndodhë, është mirë që Shqipëria të vijojë me përparimet, dhe fusha kyçe ku pritet ky përparim, është procesi i vetingut, si dhe zgjatja e tij, pra dhe historiku, bilanci në luftën kundër krimit të organizuar dhe korrupsionit, përfundoi fjalën e tij Soreca.
