Ka ngjallur reagime të shumta në rrjet pohimi i pediatres Alketa Hoxha dhënë në “Top Albania Radio, e cila ka pohuar se nuk do prekë me dorë asnjë fëmijë që nuk ka kryer vaksinën e covid-19.
Unë do të deklaroj këtu, është shprehur ajo, që nuk do të pranoj të vizitoj kurrë një fëmijë, i cili nuk vaksinohet, sepse në momentin që ky fëmijë i pa vaksinuar vjen për vizitë tek unë, aty mund të kem një fëmijë, që larg qoftë të ketë një sëmundje si leucemi ose ndonjë sëmundje tjetër që është problematike te fëmijët. Atëherë, ky fëmijë që mezi ka shpëtuar nga sëmundja bazë, të marrë një virozë apo një sëmundje të fëmijës tjetër që s’është vaksinuar, kjo është fatale… është vdekjeprurëse. Vaksinimi nuk është përgjegjësi vetëm vetjake, por është përgjegjësi për tërë botën. Fatin e botës e kemi ne në dorë.
Pavarësisht dëshirave të pediatres Alketa Hoxha, vaksinimi anti- covid për fëmijët nën 16 vjeç nuk rekomandohet ende, për shkak se nuk janë kryer akoma studime dhe testime të mjaftueshme për të kuptuar efektet e vaksinës në këto grupmosha.
Sipas mjekut Erion Dasho, në një intervistë dhënë për MetropolPost-in, të gjitha autoritetet rregullatore që merren me vaksinën, kanë vendosur që derisa të kenë të dhëna të plota se çfarë ndodh tek fëmijët, vaksina kovid të mos rekomandohet tek ta. Kur u bënë provat e fundit, shprehet ai, ato masivet, përpara se një profukt mjekësor të marrë miratimin, numri i fëmijëve përfshirë në to qe i ulët dhe nuk lejonte të gjykohej me bindje nëse kishte apo jo rrezik dhe nëse kishte efekte anesore në këto grupmoshë. Për këtë arsye, të gjitha autoritetet rregullatore, vendosën që derisa të kemi të dhëna të plota, se çfarë ndodh tek fëmijët, vaksina të mos rekomandohet tekpër ta.
Kujtojmë që vaksina Pfizer&BioNtech është për mbi 18 e lart, kurse Moderna për moshat nga 16 vjeç e lart.
