Nga shef Mondi
Osatë e Gjirokastrës, në zona të tjera të Shqipërisë kanë emra të ndryshëm, si dromëza në Çamëri, rosnica në Korçë e përreth, etj. Gatuhen si supë ose si pilaf në furrë. Në këtë recetë i prezantojmë të gatuara si pilaf me shkurtëza.
Për 4 persona
Shkurtëza, 4 copë
Osa, 320 gr
Qepë, 200 gr
Karrota, 150 gr
Selino 80 gr
Gjalpë, 30 gr
Piper i zi, sipas dëshirës,
Kripw, sipas dëshirës,
Lëng pule 960 ml
Pastrojmë dhe qërojmë qepët, karrotat dhe selinonë. Pasi i lajmë, i presim në kubikë të vegjël. Në një tigan, kaurdisim me gjalpë perimet e prera derisa të zbuten dhe të humbasin lëngun vegjetal.
Shtojmë osat dhe vazhdojmë kaurdisjen për 3 minuta, duke i përzier vazhdimisht. I rregullojmë me kripë dhe piper, i hedhim në një enë për furrë, i shtojmë lëngun e pulës të nxehtë (ose ujë).
Vendosim sipër shkurtëzat e pastruara, të kriposura dhe të lyera me pak gjalpë. I vendosim në furrë të paranxehur në temperaturë 180 gradë për rreth 25 minuta, derisa osatë të pijnë lëngun dhe shkurtëzat kenë marrë njgyrën e kuqërremtë.
