Sapo ka dalë në botim një libër tejet intrigues mbi figurën e liderit. Ai mban titullin “Lideri nuk lind… bëhet!” dhe vjen me firmën e studiueses Iris Halili.
E pyetur nga MetropolPost se përse flet ky libër dhe nga se është frymëzuar, studiuesja Halili thotë se botimi i tij, përpos se i frymëzuar prej studimeve të Masterit e Doktoratës në Shtetet e Bashkuara të Amerikës, vjen edhe si pasojë e dëshirës së saj që këto dije shkencore të marra gjatë studimit, relativisht të reja për botën e lidershipit, t’i ndajë edhe me shoqërinë shqiptare
Sapo keni botuar librin “Lideri nuk lind…bëhet!” Ç’trajton ai?
Libri “Lideri nuk lind… bëhet” është një sintezë e mbështetur në shumë studime të miat përgjatë viteve të fundit. Pikë së pari, është frymëzuar nga shkolla e Masterit dhe e Doktoraturës kryer në Shtetet e Bashkuara të Amerikës për lidershipin, dhe së dyti, nga dëshira e sinqertë që këto dije shkencore relativisht të reja në botën akademike, t’i ndaja edhe me shoqërinë shqiptare. Shkolla e Lidershipit, si disiplinë, nuk është shumë e vjetër, dhe ka marrë përparësi sidomos këto 30 vitet e fundit.
Qëllimi i librit ka qenë vetëm utilitar, me fokus parësor lexuesin shqiptar, për t’i ardhur me një informacion sintezë, që do t’i hapë një dritare për mënyrën se si dhe kur duhet vlerësuar një lider, si dhe sa duhet vlerësuar forca e ndjekësve, apo pse ne si shoqëri kemi probleme të zgjedhim liderin e duhur. Për t’i dhënë përgjigje pyetjes, pse lideri më shumë zgjedh të bëhet se sa ka lindur i tillë, jam ndalur edhe tek tiparet e lidershipit të femrës. Libri në vetvete jep shumë përgjigje dhe, modestisht them se, pasi e lexon, çdo mendje mund t’i kuptojë më thellë liderët që ka përballë, të vleresojë veten në raport me ta, si dhe, në të ardhmen, të dijë të japë votën, apo bëj dallimin.
Në libër sillni disa shembuj nga lidershipi botëror e shqiptar, ashtu sikurse përmendni në përgjithesi tiparet e lidershipit shqiptar, por nuk keni zgjedhur të ndaleni gjatë tek këta të fundit. Përse?
Qëllimi i librit nuk ishte të analizoja lidershipin shqiptar, ky mund të jetë një projekt i dytë. Qëllimi qe t’u prezantoja lexuesve tiparet kryesore të liderëve apo lidershipit, të mirë e keq, si dhe të shpjegoja rëndësinë që luan karakteri i liderit apo kultura e një vendi në lidership, dhe se cilat jane ato tipare që e bëjne liderin të deshtuar apo të suksesshëm.
Nëse do të ndalesha në raste konkrete shqiptare, do krijoja polarizime në lexim, pasi duam apo s’duam, ne si shoqëri, sa herë nisemi të lexojmë apo analizojmë një lider, vendosim në fillim paragjykimin apo bindjen personale ose politike.
Kjo do ta dëmtonte librin dhe, mbi të gjitha, do dëmtonte misionin e tij, si dhe do anashkalonte dhënien e një informacioni shkencor, parë nga këndvështrimi im personal, por mbështetur mbi studime të aprovuara shkencore.
Unë e lë qëllimisht të hapur debatin në libër, pasi kam dashur, sikur edhe e nënvizoj aty, ta lë lexuesin në rolin e vetëshkruesit, pra që ai vetë të sjellë në kujtesë rastet e liderëve që ka njohur, dhe t’i krahasojë ata me informacionin që merr përmes librit.
I mbështetur në teoritë më të fundit të shkencës së lidershipit, me një gjuhë sa akademike, të rrjedhshme e të qartë, libri ofron një tejqyrë tejet interesante për të kuptuar dhe analizuar sa më mirë figurën e liderit dhe ndikimin që ka ai në ngjizjen e një shoqërie, e sidomos të një shoqërie si e jona, e cila historikisht, është treguar problematike në përzgjedhjen e liderit të vet.
