Jemi në këtë kontekst: Eduardi një dyzetvjeçar i suksesshëm, virolog i njohur në gjithë botën, beqar, kalon nga një grua te tjetra, si një djalosh i përjetshëm. Takimi me Ruthin i vjen si një rrufe në qiell të pastër: e bukur, plot jetë dhe e pasionuar siç ndodh kur je njëzet vjeç. Ai beson se me Ruthin ka të fituar betejën ndaj plakjes, por triumfi i dukshëm, përkthehet në luftë të pabarabartë.
Eduardi e kupton se martesa me Ruthin, jo vetëm nuk e ka rinuar, por përkundrazi, ai po plaket dita-ditës, dhe hendeku i moshës mes tyre, ia bën shenjat e plakjes më të dukshme e të padurueshme.
Mes dy botëve, të tijës e të sajës, nis e thellohet një hendek. Ai, një njeri ambicioz i shkencës, që vë pragmatizmin racional para ndjenjave, ajo idealiste e ndjeshme deri në skaj, që nuk pranon eksperimentet e tij tek kafshët dhe aq më pak refuzimin e shkencëtarit për të kuptuar vuajtjet.
Kur fëmija, të cilin e dëshiron vetëm Ruthi, ia kthen pasionin në detyrim, kur pasiguria bëhet “e durueshme vetëm duke zënë një dashnore edhe më të re”, kështjella e martesës nis e shembet gur pas guri…
Si një hero tragjik i ditëve moderne, ai do zbulojë kuptimin e vërtetë të vuajtjeve.
I saktë, ironik dhe i mprehtë si bisturi, lapsi i Tommy Wieringas përshkruan nuancat më delikate të një marrëdhënieje bashkëshortore. Të gjithë jemi paksa të ngjashëm me të, në pamundësinë dhe mungesën e dëshirës për të hequr dorë nga vetja, për të kuptuar tjetrin. Ai pyet veten çfarë është dhimbja, dhe a mund ta kuptojmë pa e provuar më parë në lëkurën tonë, një pyetje e cila, nga rreshti në rresht, të rrëmben duke të nxitur ta rrosh atë marrëdhënie si të ishte e jotja.
Wieringa është autor i shumë romaneve të suksesshme, të përkthyera në disa gjuhë të botës, e po ashtu edhe fitues i disa çmimeve si ai Ferdinant Borderwijk, dhënë përvit në Hollandë nga Fondacioni Jan Campert për prozën më të mirë hollandeze, Libris Prize, një çmim që jepet për librin më të mirë shkruar në origjinal në hollandisht, Bookspot Literatuurprijs, i nominuar po ashtu per cmimin International Booker Prize, më 2019-n, me librin e tij De dood van Murat Idrissi (2017), Vdekja e Murat Idrizit.
Një grua e re dhe e bukur, është libri i parë që vjen në shqip prej këtij autori.
