Një qytetare ka kërkuar sot ndihmë në rrjetin social fejsbuk, për një grua të re tek të 21 vjeçët, e cila, me një fëmijë dy vjeç dhe shtatzënë endet rrugëve të Tiranës duke lypur, pa nje strehë për kokën.
Kjo grua quhet Rovena dhe është 21 vjeç, shkruan qytetarja. Jeta e ka përplasur në rrugë, me një djalë 2 vjeç dhe një tjetër në bark, tetë muajsh. Ka bërë vetëm pesë klasë shkollë, për t’i shpëtuar njerkut iku me të parin që i premtoi se do kujdesej për të. Por dhe ai e braktisi. Prej gjashtë muajsh jeton në rrugë dhe nuk di fat tjetër,por fëmijën nuk e braktis. Mbrëmjeve ka një strehë ku dorëzon të gjitha paratë e mbledhura dhe gjen një tas me bukë. Lyp me dinjitet, pa nxjerrë zë dhe pa thirrur. Unë e gjeta një dite dimri në prag të një lokali. Nuk më kerkoi asgje, nuk e shtriu dorën, veç tregoi këtë histori të dhimbsur, si për të kuptuar se fatet s’janë njësoj. E mbulova me nje xhup timin dhe i mora pak ushqime… djali më buzëqeshi..pastaj nuk e pashë më. Sot e rigjeta perpara Ringut. Nuk e di si do t’i vejë filli. E ëma nuk e pranon, ai që e bëri nënë nje zot e di ku ka shkuar.. i ati nuk do t’ia dije per asgje. Vjen çdo mëngjes për të lypur nga përtej shinave të trenit dhe mbledh kacidhet e hedhura per nje krevat dhe një copë bukë në darkë. Po të mos ishte shtatzënë me siguri do ta shfrytëzonin edhe seksualisht. E pyeta nëse kërkon ndihmë. Me tha një Jo të prerë. Kush e di se kush e vëzhgonte nga larg. A mund të ndihmohet? Si mund të ndihmohet? A ka një politikë sociale që mund ta rehabilitohë e t’i shpëtojë rrugës e shfrytëzimit? Pas një muaji do lindë fëmijën e dytë…. një tjetër krijesë e pafat dhe pa të ardhme.
Nese dikush ka ndonje zgjidhje lutem t’me kontaktoni ne inbox!
Nuk dihet ende seç bëjnë shërbimet sociale në Shqipëri apo se si mund ta ndihmojne ate të re shoqatat e grave që protestojne kur vritet apo dhunohet një grua, por fakt është, sipas asaj që ka shkruar qytetarja, që e reja gdhihet e gryset duke lypur bashkë me foshnjën, ditëve të ftohta të dimrit.
