Ka reaguar për herë të parë kreu i shtetit Ilir Meta, pas shkarkimit që i bëri Parlamanti me 104 vota pro.
Në fjalën e tij gjatë konferencës për shtyp, Meta e cilësoi periudhën pas zgjedhjeve të 25 prillit, si periudha e rikthimit të epokës së pluralizmit politik, dhe e cilësoi shkarkimin e tij prej Parlamentit, si shfaqjen e radhës për të hequr vëmendjen nga krimet dhe hetimet zgjedhore. Meta theksoi edhe një herë gatishmërinë e tij për të biseduar me ata që ndërmorën inciativën e shkarkimit të tij, edhe pse në gjykimin e tij Parlamenti që e votoi këtë shkarkim, qe shkarkuar që më 25 prill.
Mirëse erdhët në epokën e pluralizmit politik, tha Meta. Mbase s’ka shumë arsye për të qenë të lumtur, por duhet të jemi të kënaqur që po kalojmë nga epoka e para 25 prillit e Parlamentit monist, në një epokë të pluralizmit politik, parlamentar, pavarësisht se zgjedhjet nuk kanë përfunduar, dhe duhet të jemi të duruar derisa të përfundojnë të tëra kërkesat e ankimimit, por meqë ka pasur insistime nga ana juaj për intervista, konsiderata lidhur me shfaqjen më të fundit të Parlamentit monist, ju e dini që jemi përpjekur të qëndrojmë larg asaj shfaqjeje, sepse ju e dini që ajo ka qenë një shfaqje e qartë, për të hequr vëmendjen nga hetimi për krimet zgjedhore dhe zbardhja e tyre, dhe për të spostuar vëmendjen tek faktorë që nuk ekzistojnë.
Meta theksoi se ai nuk qe përfshirë në fushatë siç pretendonin ata që e shkarkuan, por se ka qenë Rama ai që e ka përfshirë vazhimisht në fushatë, përmes videove krahasuese e billborderave të fushatës. Meta pranoi që kishte bërë fushatë vetëm për mbarëvajtjen e zgjedhjeve, e se do vazhdonte ta mbante postin e presidentit deri në përfundim të mandatit, pra deri më 25 korrik të 2022-it.
Unë jam përfshirë në një fushatë për mbarëvajtjen e zgjedhjeve. Kam bërë një fushatë të hapur “denonco krimin zgjedhor”, ku janë ftuar të gjitha forcat politike dhe qytetarët të bashkëpunojnë.
Nuk kam asnjë shqetësim nga akti dëshpërues i Parlamentit të shkarkuar në 25 prill. Unë pres me shumë qetësi edhe durim, përfundimin e gjithë procesit të ankimimeve dhe të bashkëpunoj me shumicën e re, kushdo që do të jetë, dhe me opozitën e re, në Parlamentin e ri, gjithmonë në respekt të Kushtetuës, të procesit të Integrimit Europian dhe vendosjes së sistemit të llogaridhënies, kuptohet hap pas hapi në të gjitha nivelet, po të paktën, janë të gjitha mundësitë që kjo të fillojë të ndodhë në Kuvendin e ri. Kini durim deri më 24 korrik të vitit të ardhshëm, tha Meta, do të jemi këtu në mënyrë të vahdueshme. Me fillimin e sezonit të ri, do të jemi në mënyrë shumë më aktive këtu.
