Ka ngjallur reagime të shumta krahasimi i kandidatëve për deputetë të PS-së, me ata të partive opozitare, bërë nga kreu i PS-së Edi Rama, gjatë takimit me grupin socialist, nën moton “Partia Socialiste, Nisim Sprintin më 25 prill”. Gjatë fjalës së tij, Rama i kërkoi ekipit mbështetës të hidhej në sulm për të arritur synimet e vëna nga PS-ja, duke e krahasuar ekipin e PD-së me një orkestër që shkon në dasëm.
Kush mund t’i bëjë këto veç nesh? u shpreh ai. Kush mund t”i fitojë betejat që i duhen shqipërisë, nëse jo ne? Kush mund ta çojë këtë vend më tutje përpara veç nesh, kush, kur, ku, cili cila që nuk i kanë lënë lekët me fajde tek Monika apo pa gajle tek Saliu dhe Iliri, mund të mos e shohë dallimin e madh si dita me natën, mes nesh dhe atyre, që sot kanë nxjerrë përpara një dhëndër, Lulin, dhe janë nisur për dasëm, me kalastrenat e Gon Dukës, me faqoren e Dash Shehit, me kapsollat e Fatmir Mediut, me kecat e Tym Idrizit, me vetullat e Vangjel Dules, me kasetat e Salianit, Preçit e Dritanit, peshqirin e Xhelalit, simiten e Xhaferrit të Durrësit, fuçitë e rakisë së Leskos së Vlorës, dhe gërrnetën e Mesilës. Kurrë, kurrë që nga 1921a, Shqipëria nuk e ka parë këtë taborrë krushqish, që kam frikë, kam shumë frikë, po e themi mes nesh, që deri më 25 prill, do ta çojnë nga varri të ndjerin Çeço Musarai, që është me të drejtën e Zotit të çohet nga varri, e ta hedhë Lulin në gjyq për të drejtën e autorit, sepse i ka kopjuar vargjet e tij të famshme, “Pa kur t’i shohësh dervenë-dervenë, në vend të pushkëve gota dhe enëve, në vend të pushkëve bastun ombrella, pandofla, guante, pizham, kapella”. Kapella, kapella… Tani m”u kujtua Grida, krushka nga Kavaja, me pishtarin e demokracisë, mes tërë atyre relikeve të historisë […] Paloka, me barkun që i nxjerr kudo bardhakë. Nuk është për të qeshur, është për të qarë ku u katandis pas 30 vjetësh, Partia Demokratike, në një cirk ambulant, që ka madje edhe elefantë… theksoi Rama në fjalën e tij.
