Presidenti Meta ka dekoruar ditën e sotme regjisorin e njohur Dhimitër Anagnosti, me dekoratën ‘Gjergj Kastriot Skënderbeu’.
Vetë Anagnosti në fjalën e falënderimit, u shpreh se kjo qe një ditë e veçantë për të, se falënderonte gjithë bashkëpunëtorët, e se nga emocionet, e kish të vështirë të fliste: Unë jam kineast tha ai, dhe kineasti bën një vepër që jeton, që jeton edhe në brezat që vijnë. Sot nuk e kam të lehtë të flas, se dhe emocioni më dominon. Falënderoj bashkëpunëtorët dhe presidentin, që më vlerëson me një një çmin që më nderon.
Në pamundësi të bashkëshortit për të folur më tej, fjalën e mori aktorja e njohur Roza Anagnosti, e cila lexoi edhe letrën e shkruar prej tij me këtë rast.
Dikur diku kam shkruar, që në pleqeri njeriut i dobësohet shikimi, sepse nis të shohë më tepër brenda vetes, se sa jashtë saj. Juridikisht jam i pavdekshëm, se AND-ja ime udhëton në përjetësi përmes brezave.
I them këto rreshta që të komunikoj me fëmijët e mi, fëmijët e tyre, me breza më tej e më tej, për të kuptuar se çfarë i jep jetës nxitje e kuptim, si të jetohet ajo më mirë, në kuptimin material, intelektual, moral dhe emocional.
Duhet bërë kujdes në ndërtimin e jetës. Ta ngremë kokën hera-herës nga problemet e përditshme, dhe të shikojmë yllin polar, për të mos humbur drejtimin e rrugëtimit.
Në këtë vend, në këtë truall, ,ku brezat kanë derdhur energjitë fizike, intelektuale, morale shpirtërore, rrezatohet një energji misterioze e shumëllojshme, që ta bën jetën më të lehtë, më të plotë, më me kuptim: energjia e memories historike.
