“Kristali dhe interneti çudimadh”, shkruar prej autores Albana Nexhipi Lekaj, ishte një prej librave të rinj për fëmijë, që u prezantua në panairin e 26 të librit, që sapo përfundoi.
Libri, cilësuar për grupmoshat nga 5 deri në 12 vjeç, por i pamoshë sa i takon debatit mbi internetin dhe fëmijët, vë në fokus një nga çështjet më të mprehta e më të debatueshme mes prindërve e fëmijëve, atë të sa kohë dhe si, duhet t’ua prezantojmë fëmijëve botën e internetit.
Dy fjalë për subjektin
Subjekti i kësaj gatipërralle është i thjeshtë: Kristalit, një vajze 6 vjeçare, prindërit ia kanë mbajtur të fshehtë internetin, duke u përpjekur që në vitet e para të jetës ta fokusonin më tepër tek loja dhe aktivitetet në natyrë, mirëpo, kur shkon në klasë të parë, Kristali sheh tërë shoket e shoqet me ipad e celularë në duar, tek klikojnë parreshtur me to.
Kristali shqetësohet shumë, ndaj shkon e pyet me vrap të atin, për atë risi që çuditërisht nuk ia kishin zënë sytë kurrë e veshët.
“Përse nuk e kam?”, është pyetja që ajo i drejton të atit, teksa i ati mëdyshet në t’ia ofrojë që tani ipadin me internet, apo të këmbëngulë dhe cazë e t’ia mbajë fshehurazi. Në fund vendos t’i rrëfejë një histori të stërgjyshes e saj, e cila u kishte lënë të tërëve një amanet.
Kristali e dëgjon historinë historinë e të atit dhe amanetin e stërgjyshes që e parajmëronte për internetin dhe dëmet që mund të vinin prej përdorimit të shumtë të tij, por sërish donte, si shokët, ta kishte edhe ajo internetin.
I ati nuk pati udhë tjetër përveçse t’ia tregonte, e ajo, po si bashkëmoshatarët e vetë, humbi në të për ditë e ditë me radhë.
Por… mjaft shpejt, bën një zbulim fantastik që e lumturon tej mase atë vetë e të atin, që është njëkohësisht edhe një mesazh shumë i rëndësishëm për të tërë fëmijët e prindërit sot.
Falë ilustrimeve mjeshtërore të piktorit Artur Dauti, mesazhi vjen shumë më i qartë pranë fëmijëve, duke i zhytur ata përnjimend në botën aq shprehëse të “Kristalit dhe Internetit Çudimadh”
Dy fjalë për autoren
Albana Nexhipi Lekaj ka mbaruar studimet Pas Universitare për Letërsi, ka kryer Specializimin Pas Universitar në Peruxha të Italisë për Letërsi të Krahasuar, ka punuar për një kohë të gjatë si gazetare e autore programesh në mediat më në zë të vendit, ka qenë lektore e disa lëndëve në universitet e po ashtu edhe përkthyesja e rreth 30 titujve në shqip, nga të cilët 15 tituj për fëmijë.
Ky është libri i saj i parë.
