Kina rezulton partneri kryesor tregtar i Unionit Europian më 2020-n. Ky ka qenë përfundimi i raportit nxjerrë ditën e hënë prej Eurostat-it, sipas së cilit importet nga Kina gjatë 2020-s janë rritur me 5.6%, kurse eksportet me 2.2 %.
Po sipas Eurostat-it, tregtia e Unionit Europian me Shtetet e Bashkuara që kryesonin më parë listën e partnerëve tregtarë me UE-në, ka njohur një rënie të dukshme si në importe, ashtu dhe eksporte. Ndërkaq, UE-ja ka njohur një rritje të shkëmbimeve tregtare me botën në dhjetor të 2020-s, me një rritje prej 6.6 miliardë eurosh, krahasuar me të njëjtin muaj në 2019.
Po sipas Eurostat-it, tregu në 2020-n ka pësuar një zvogëlim prej 9.4 % eksportime e 11.6% importime dhe, me goditjen e industrive nga pandemia, energjia ka rregjistruar rënien më të madhe nga gjithë sektorët, pasuar nga ushqimi, pijet, lëndët e para dhe produktet kimike.
